بۇگىن شىمكەنت قالاسىنىڭ اكىمى مۇرات ايتەنوۆ وتىرار جانە «ايقاپ تۇركىستان» شاعىن اۋداندارىنداعى اتقارىلعان جۇمىستاردى كورىپ، تۇرعىندارىمەن كەزدەستى.
10 مىڭعا جۋىق تۇرعىنى بار اتالعان شاعىن اۋداندار ەلەكتر، تابيعي گاز، اۋىز سۋمەن تولىق قامتاماسىز ەتىلگەن. تەك «ايقاپ تۇركىستان» شاعىن اۋدانىنداعى كارىز جۇيەسى 50 پايىزدىق كورسەتكىشتە. بۇل شاعىن اۋدانداعى تۇرعىنداردىڭ باسىم بولىگى جەكە سەكتوردا تۇرادى. كوشەلەرىنىڭ 98 پايىزى اسفالتتالعان. بيىل كوكتاس كوشەسى جارىقتاندىرىلاتىن بولسا، جاڭاعاسىر، كوكتەم، زامان كوشەلەرىن جارىقتاندىرۋعا ۇسىنىس بەرىلدى. اكىممەن كەزدەسۋگە كەلگەن جەرگىلىكتى تۇرعىندار كارىز جۇيەسىن تولىعىمەن شەشىپ بەرۋدى سۇرادى.
ال، وتىرار شاعىن اۋدانىنىڭ تۇرعىندارىن اياقجول، تازالىق، كوپ قاباتتى ۇيلەردىڭ سىرتىن ارلەۋ، ليفت، جىلۋ جۇيەسى ماسەلەسى تولعاندىرادى. مۇنداعى 33 كوپ قاباتتى ءۇي تولىعىمەن جاڭا باسقارۋ نىسانىنا وتكەن.
قالا اكىمى جاي سەرىكتەستىك پەن ءۇي بىرلەستىكتەرىن قۇرۋدىڭ ماڭىزدىلىعىن ءتۇسىندىرىپ، جوندەۋ جۇمىستارى، اۋلاداعى جانە ءۇيدىڭ كىرەبەرىس تازالىعىن ءوز جاۋاپكەرشىلىكتەرىنە الۋ كەرەكتىگىن جەتكىزدى. جولاۋشىلار كولىگى جانە اۆتوموبيل جولدارى باسقارماسىنىڭ باسشىسىنا جانىبەكوۆ كوشەسىنە قوعامدىق كولىك قاتىناۋىن جانە اياقجول سالۋ بويىنشا زەردەلەۋ جۇمىستارىن جۇرگىزىپ، ۇسىنىس ەنگىزۋدى تاپسىردى. وزگە دە ماسەلەلەردى تالقىلاپ، قاجەتتى شارالار جاسالاتىنىن جەتكىزدى.
شىمكەنت قالاسى اكىمدىگىنىڭ ءباسپاسوز قىزمەتى
