قازاقستان جۋرناليستەر وداعى مەن «ءادىل ءسوز» ءسوز بوستاندىعىن قورعاۋ قورى ۋكراينا-رەسەي ماسەلەسىنە قاتىستى ەلدەگى باق وكىلدەرى مەن بولگەرلەرگە قاراتا مالىمدەمە جاسادى، دەپ حابارلايدى "ادىرنا" ءتىلشىسى.
«رەسەي-ۋكراينا شيەلەنىسى قازىر بۇكىل الەمدە تالقىلانىپ جاتىر. ول قازاقستانداعى الەۋمەتتىك جەلىدە دە قاتتى بەلسەندىلىك تۋعىزدى. ازاماتتار، ءبىرىنشى كەزەكتە جۋرناليستەر كونستيتۋتسيامىزدا كەپىلدىك بەرىلگەن ءسوز بوستاندىعىن تولىق كولەمدە پايدالانىپ، ويلارىن ەركىن جەتكىزىپ جاتىر. بىراق كوبى ءوز پايىمدارىن قورعاۋ كەزىندە قان قىزۋىمەن شەكتەن اسىپ كەتۋدە. ال ونداي شەك بىتكەن جەردە جەك كورۋ ءتىلى باستالادى»، - دەپ جازىلعان قازاقستان جۋرناليستەر وداعىنىڭ رەسمي سايتىنا جاريالانعان مالىمدەمەدە.
مالىمدەمە اۆتورلارى بۇگىنگىدەي جاعدايدا اقپارات تاراتۋدىڭ حالىقارالىق ستاندارتتارى بار ەكەنىن ەسكە سالادى.
«ەستەرىڭىزگە سالامىز: حالىقارالىق ستاندارتتار، اتاپ ايتقاندا، ۇلتتىق، ناسىلدىك نەمەسە ءدىني وشپەندىلىكتى ناسيحاتتاۋعا تىيىم سالۋ جونىندەگى راباتتىق ءىس-قيمىل جوسپارى «جەككورۋشىلىك» پەن «دۇشپاندىقتى» ماقساتتى توپقا قاتىستى ايىپتاۋدىڭ، دۇشپاندىقتىڭ جانە نارازىلىقتىڭ تەرەڭ جانە يرراتسيونالدى سەزىمدەردىڭ كورىنىسى رەتىندە قاراستىرادى. ياعني، ءسىز كەز كەلگەن ارەكەتتى نەمەسە ارەكەتسىزدىكتى جەك كورە الاسىز، بىراق ءسىز ازاماتتىعىنا، ۇلتىنا، دىنىنە بايلانىستى، ۇلتتى، ءدىني نەمەسە باسقا ادامدار توبىن جەك كورە المايسىز.
كىمدى بولسا دا، اسىرەسە، بۇقارالىق اقپارات قۇرالدارىندا جانە الەۋمەتتىك جەلىلەردە اشىق جەك كورۋ – قالاي دەسەك تە، جاناما بالكىم شامالى موشەردە بولاتىن شىعار، ءبارى ءبىر قارسى ناسيحات. وسى ءسوزىم ارقىلى ادامداردى نەگە شاقىرىپ تۇرمىن؟ مۇنىڭ ارتى ءىس جۇزىندە نەگە اكەلۋى مۇمكىن؟ ءوز پىكىرىڭىزدى بىلدىرە وتىرىپ، الدىمەن وسى جاعىن ويلانۋ كەرەك»، - دەلىنگەن مالىمدەمەدە.
مالىمدەمەنىڭ ءتۇيىنى كەز كەلگەن پىكىرتالاس جالپى ادەپ نورمالارىنان الىس كەتپەۋى كەرەك دەگەنگە سايادى.
«ءبىز كەز كەلگەن وتكىر ماسەلەنى ءسوزجارىس، پىكىرتالاس ارقىلى اشىق تالداۋدى قولدايمىز. دايەكتەرگە سۇيەنگەن، ەشكىمدى قورلاماي، كەمسىتپەي، قورقىتىپ-ۇركىتپەي جانە اگرەسسيا تانىتپاي داۋلاسۋدى جونە دەپ بىلەمىز. قوعامداعى حاوس – سوزدەگى حاوستان، سوزدەگى حاوس – باستاعى حاوستان باستالادى. ونداي تىزبەك كىمگە كەرەك؟
جۋرناليستەر مەن بلوگەرلەردىڭ ءوز ۇستانىمدارىن بىلدىرگەن كەزدە ءسوزجارىس مادەنيەتىن، قارسىلاسقا دەگەن قۇرمەت پەن قوعام الدىنداعى جاۋاپكەرشىلىكتى ەستە ساقتاۋى بۇرىن-سوڭدى ءدال مۇنداي ماڭىزدى بولىپ كورگەن جوق دەپ ەسەپتەيمىز»، - دەپ جازىلعان قازاقستان جۋريناليستەر وداعى مەن «ءادىل ءسوز» قورىنىڭ بىرلەسكەن مالىمدەمەسى.
"ادىرنا" ۇلتتىق پورتالى
