ۇلتتىق قاۋىپسىزدىك كوميتەتىنىڭ ەكس-توراعاسى كارىم ءماسىموۆتىڭ قاماۋعا الۋ مەرزىمى 6 مامىرعا دەيىن ۇزارتىلدى. بۇل تۋرالى Sputnik قازاقستان ۇقك-نىڭ رەسمي ساۋالىنا بەرگەن جاۋابىن جاريالادى، دەپ حابارلايدى “ادىرنا” ۇلتتىق پورتالى .
كارىم ءماسىموۆتىڭ بۇرىنعى ورىنباسارلارىنىڭ قاماۋعا الۋ مەرزىمى دە ۇزارتىلعان.
«ءماسىموۆ پەن سادىقۇلوۆتىڭ قاماۋ مەرزىمى 2022 جىلدىڭ 6 مامىرىنا دەيىن، ەرعوجيننىڭ قاماۋ مەرزىمى 2022 جىلدىڭ 8 مامىرىنا دەيىن ۇزارتىلدى» دەلىنگەن حابارلامادا.
سونداي-اق، ۇقك توراعاسىنىڭ ەكس-ورىنباسارى مارات وسيپوۆتى قاماۋدا ۇستاۋ مەرزىمىن ءۇش ايعا ۇزارتۋ تۋرالى ماتەريالدار دا پروكۋراتۋراعا جىبەرىلدى.
«كۇدىكتىلەر ۋاقىتشا ۇستاۋ يزولياتورىنا قامالدى» دەپ حابارلادى ۇقك.
بۇعان دەيىن، كارىم ءماسىموۆ كوپتەگەن سوزىلمالى اۋرۋلارمەن اۋىرادى دەگەن اقپارات تاراعان بولاتىن.
ايتا كەتەيىك، كارىم ءماسىموۆ ۇقك باسشىسى قىزمەتىنەن بوساتىلىپ، مەملەكەتكە وپاسىزدىق جاسادى دەگەن كۇدىكپەن قاماۋعا الىندى. ونىڭ ورنىنا ەرمەك ساعىمباەۆ تاعايىندالدى.
سونداي-اق، ۇقك باسشىسىنىڭ ورىنباسارلارى – ءانۋار سادىقۇلوۆ پەن داۋلەت ەرعوجين دە قىزمەتتەرىنەن بوساتىلدى.
13 قاڭتاردا ءماسىموۆتىڭ دە بيلىكتى كۇشپەن باسىپ الۋعا جانە بيلىكتى اسىرا پايدالانۋعا باعىتتالعان ارەكەتتەرىمەن كۇدىككە ىلىنگەنى، سادىقۇلوۆ پەن ەرعوجيننىڭ ۇستالعانى تۋرالى دا بەلگىلى. كەيىن ءماسىموۆ پەن سادىقۇلوۆتى سوت قاماۋعا الىپ، ءىس «قۇپيا» ساناتقا جاتقىزىلعانى ايتىلدى.
ال 8 اقپاندا ۇقك «ارىستان» ارنايى قىزمەتىنىڭ ديرەكتورى مەن وسى قىزمەت ورتالىعىنىڭ باسشىسى ۇستالعانى، ال 23 اقپاندا كوميتەت باسشىسىنىڭ تاعى ءبىر بۇرىنعى ورىنباسارى مارات ءوسىپوۆتىڭ ۇستالعانى بەلگىلى بولدى.
“ادىرنا” ۇلتتىق پورتالى
