Ulttyq qaýipsizdik komıtetiniń eks-tóraǵasy Kárim Másimovtiń qamaýǵa alý merzimi 6 mamyrǵa deıin uzartyldy. Bul týraly Sputnik Qazaqstan UQK-nyń resmı saýalyna bergen jaýabyn jarııalady, dep habarlaıdy “Adyrna” ulttyq portaly .
Kárim Másimovtiń burynǵy orynbasarlarynyń qamaýǵa alý merzimi de uzartylǵan.
«Másimov pen Sadyqulovtyń qamaý merzimi 2022 jyldyń 6 mamyryna deıin, Erǵojınniń qamaý merzimi 2022 jyldyń 8 mamyryna deıin uzartyldy» delingen habarlamada.
Sondaı-aq, UQK tóraǵasynyń eks-orynbasary Marat Osıpovty qamaýda ustaý merzimin úsh aıǵa uzartý týraly materıaldar da prokýratýraǵa jiberildi.
«Kúdiktiler ýaqytsha ustaý ızolıatoryna qamaldy» dep habarlady UQK.
Buǵan deıin, Kárim Másimov kóptegen sozylmaly aýrýlarmen aýyrady degen aqparat taraǵan bolatyn.
Aıta keteıik, Kárim Másimov UQK basshysy qyzmetinen bosatylyp, memleketke opasyzdyq jasady degen kúdikpen qamaýǵa alyndy. Onyń ornyna Ermek Saǵymbaev taǵaıyndaldy.
Sondaı-aq, UQK basshysynyń orynbasarlary – Ánýar Sadyqulov pen Dáýlet Erǵojın de qyzmetterinen bosatyldy.
13 qańtarda Másimovtiń de bılikti kúshpen basyp alýǵa jáne bılikti asyra paıdalanýǵa baǵyttalǵan áreketterimen kúdikke ilingeni, Sadyqulov pen Erǵojınniń ustalǵany týraly da belgili. Keıin Másimov pen Sadyqulovty sot qamaýǵa alyp, is «qupııa» sanatqa jatqyzylǵany aıtyldy.
Al 8 aqpanda UQK «Arystan» arnaıy qyzmetiniń dırektory men osy qyzmet ortalyǵynyń basshysy ustalǵany, al 23 aqpanda komıtet basshysynyń taǵy bir burynǵy orynbasary Marat Ósipovtyń ustalǵany belgili boldy.
“Adyrna” ulttyq portaly
