بىلتىر كۇزدە قاماۋدان بوساپ شىققاننان كەيىن ەكى ايدان سوڭ كوز جۇمعان ديسسيدەنت، اقىن ارون اتابەكتىڭ قىزى الما نۇتىشەۆا اكەسىنىڭ دەنەسىنەن تابىلعان "بەلگىسىز زاتتى" پوليتسيانىڭ بەرمەي وتىرعانىنا شاعىمداندى، دەپ حابارلايدى "ادىرنا" سايتى "ازاتتىق" راديوسىنا سىلتەمە جاساپ.
اقىن قازاسىنىڭ سەبەبىن تەرگەگەن الماتىنىڭ اۋەزوۆ اۋداندىق پروكۋراتۋراسى 24 ناۋرىزدا ارون اتابەك كوروناۆيرۋستان قايتىس بولدى دەگەن تۇجىرىم جاساپ، قىلمىستىق ءىستى توقتاتقان. بىراق اتابەكتىڭ قىزى اكەسىنىڭ دەنەسىنەن تابىلعان كىشكەنتاي جۇمباق زاتتىڭ ديسسيدەنت ومىرىنە قالاي اسەر ەتكەنىن بىلگىسى كەلەدى.
— مەن اكەمنىڭ ادەتتەگى ءبىر اۋرۋدان ولگەنىنە سەنبەيمىن. ونىڭ دەنەسىنە ساراپتاما جۇرگىزىلگەندە كەيبىر جەرى سىنعانى انىقتالدى. كەڭىردەگى، قولى مەن اياعى قاتتى سىنعان. مۇنىڭ ءبارى — قاماۋدا وتىرعاندا كورگەن ازابى. بۇل — ءبىر. ەكىنشىدەن، اكەمنىڭ وڭ اياعىنان بەلگىسىز پلاستيك زات تابىلدى. ونىڭ قالاي تاپ بولعانى بەلگىسىز. بىرەۋلەر ەنگىزدى مە، بەلگىسىز. اكەم دە بۇل تۋرالى بىلمەگەن. نازار اۋداراتىن ءبىر نارسە، مەن تاۋەلسىز ساراپتاما جۇرگىزۋ ءۇشىن وسى زاتتى ماعان بەرۋىن سۇراپ، پوليتسياعا ارىز جازدىم. بىراق ماعان بەرگەن جوق. ەندى اۋەزوۆ اۋداندىق پروكۋراتۋراسىن سوتقا بەرەمىن. ارون اتابەك قازا بولعانىمەن، ونىڭ ءىسى تۋرالى اڭگىمە ءالى بىتكەن جوق. جالعاسىپ جاتىر، – دەدى الما نۇتىشەۆا 15 ساۋىردە ازاتتىق تىلشىسىنە.
ونىڭ سوزىنە قاراعاندا، "شاڭىراق وقيعاسى" كەزىندە اكەسىنىڭ وڭ اياعىنا وق تيگەن. بىراق ارون اتابەك وقيعا تۋرالى جازباسىندا "وق ءتۇسىپ قالعاندىقتان ءوزىنىڭ جارالانعانىن دالەلدەي الماعانىن" جازعان.
"بۇل سول وقتىڭ قالدىعى ما، الدە باسقا ما، بەلگىسىز" دەيدى الما نۇتىشەۆا.
ول زاتقا تاۋەلسىز مەديتسينالىق ساراپتاما جۇرگىزگىسى كەلەدى، بىراق قۇقىق قورعاۋ ورگاندارىنىڭ ارەكەتى سوعان كەدەرگى بولىپ وتىرعانىن ايتادى. "جۇمباق زاتتى" بەرۋدەن باس تارتقان قۇزىرلى ورگاندار سەبەبىن دە تۇسىندىرمەگەن.
الما نۇتىشەۆا ديسسيدەنتتىڭ ولىمىنە بايلانىستى ءىستى قوعام باقىلاعانىن قالايدى.
ازاتتىق ءتىلشىسى ازىرگە قۇزىرلى ورگانداردان جاۋاپ الا المادى.
"شاڭىراق وقيعاسى" بويىنشا سوتتالىپ، 15 جىل تۇرمەدە وتىرعان ديسسيدەنت، اقىن ارون اتابەك بىلتىر قازاندا قاماۋدان بوساتىلىپ، ەكى ايدان كەيىن اۋرۋحانادا كوز جۇمعان.
اتابەك وزىنە تاعىلعان ايىپپەن كەلىسپەي، جىلدار بويى تولىق اقتاۋدى تالاپ ەتكەن. ول تۇرمەدە شىققاننان كەيىن ءبىر توپ بەلسەندى مەن ساياساتكەر ارون اتابەكتى قورعاۋ كوميتەتىن قۇرىپ، حالىقارالىق سوتقا شاعىمدانىپ، ارون اتابەكتىڭ ءىسىن قايتا قاراۋعا قول جەتكىزۋگە كۇش سالاتىنىن ايتقان. حالىقارالىق قۇقىق قورعاۋ ۇيىمدارى مەن جەرگىلىكتى بەلسەندىلەر ونىڭ ولىمىنە بيلىكتى كىنالاپ، تۇسىنىكتەمە بەرۋدى تالاپ ەتتى. حالىقارالىق دارەجەدە تەرگەۋ جۇرگىزۋ قاجەتتىگىن دە العا تارتتى.
ارون اتابەك ءتىرى تۇرعاندا ءوزىنىڭ دەنساۋلىعىنىڭ ناشارلاۋىنا تۇرمەدەگى قاتاڭ جاعداي مەن ازاپتاۋلار سەبەپ بولعانىن ايتقان.
