تاۋەلسىز ەلىمىزدىڭ تىنىشتىعىن كۇزەتۋ – ەر ازاماتتار ۇلەسىندەگى قاستەرلى مىندەت. بۇگىن تەپسە تەمىر ۇزەتىن جىگىتتەر ساپقا تۇرىپ، تۋعان وتانىنىڭ تىنىشتىعىن قورعاۋعا سالتاناتتى تۇردە انت بەردى. ءراسىم ۇقك شەكارا قىزمەتى الماتى وبلىسى بويىنشا دەپارتامەنتىنە قاراستى قاراساي اۋدانى بويىنشا شەكارا اۋدانىنىڭ اقجار ىقشاماۋدانىندا ورنالاسقان كاسىبي-تەحنيكالىق جانە دايىندىق بولىمىندە ءوتتى.
جاس جاۋىنگەرلەر كۋرسىنان ءوتىپ جاتقان 400-دەن استام سارباز انت بەرگەن شارانىڭ ەرەكشەلىگى، ءراسىمدى بۇكىل رەسپۋبليكا جۇرتشىلىعى تاماشالاي الاتىن تىكەلەي كورسەتىلىم ۇيىمداستىرىلسا، بۇل كۇنى الىستان ات ارىلتىپ جەتكەن اتا-انا، تۋىس، دوستاردىڭ سانىندا دا ەسەپ بولعان جوق. سوندىقتان شەكاراشى اتانعالى تۇرعان ساربازداردىڭ ومىرىندەگى اتاۋلى كۇن ولاردىڭ جاقىندارىنىڭ دا جادىندا ماڭگىلىك ساقتالىپ قالاتىن كۇن بولعانى حاق.
ايتۋ كەرەك، اتالعان شەكارا باسقارماسىنىڭ قاقپاسىنان ناۋرىز ايىندا العاش رەت اتتاعان ساربازداردىڭ بۇگىنگى اياق الىستارى شيراق، جۇرىستەرى بىركەلكى. بۇل – ولاردىڭ اسكەري ءومىردىڭ قاتاڭ تارتىبىنە قالىپتاسىپ ۇلگەرگەندەرىن بىلدىرەدى.
مامىردىڭ ءبىرىنشى جەكسەنبىسى. تاڭعى ساعات 10.00. ءار ساربازدىڭ ومىرىندە التىن ارىپپەن جازىلىپ قالۋعا ءتيىس ايتۋلى ءسات.
«ءبولىم تىك تۇر! نازار سولعا!» باستالدى. شەكارا باسقارماسىنىڭ جاۋىنگەرلىك تۋى اكەلىنگەن سوڭ شارا دا باستالىپ كەتە بارعان. ۇقك شەكارا اكادەمياسىنان ارنايى شاقىرتىلعان اسكەري وركەستردىڭ سۇيەمەلدەۋىمەن، ەلىمىزدىڭ ءانۇرانى ورىندالىپ، اتالعان باسقارما باسشىسى پودپولكوۆنيك ن.بەردىباەۆ ساپقا تۇرعان جاس ساربازداردى اتاۋلى مەرەكەسىمەن قۇتتىقتادى. بۇدان ءارى بولاشاق شەكاراشىلار انت قابىلداۋعا كىرىستى.
راسىمگە الماتى وبلىسى بويىنشا دەپارتامەنتى باستىعىنىڭ ورىنباسارى پولكوۆنيك ا.مۋنالباەۆپەن بىرگە شەكاراشى ارداگەرلەر جانە ناۋرىزباي باتىر اۋدانىنىڭ اكىمدىگىنەن كەلگەن قوناقتار قاتىستى.
...انت قابىلداۋ راسىمىنەن سوڭ باستالعان جيىندا دەپارتامەنت باستىعىنىڭ ورىنباسارى پولكوۆنيك ارنۇر مۋنالباەۆ، «زاستاۆا تارلاندارى» رەسپۋبليكالىق قوعامدىق بىرلەستىگىنىڭ الماتى وبلىستىق فيليالىنىڭ توراعاسى زاپاستاعى پولكوۆنيك الەكساندر دۋبوۆ، اۋعان سوعىسىنىڭ ارداگەرلەرى زاپاستاعى پولكوۆنيكتەر: گريگوري كۋليكوۆ، جەڭىسبەك سۇلەيمەنوۆ، بولات قۇرامىسوۆتارعا بەرىلدى. سونداي-اق، ساربازدارمەن بىرگە كوپشىلىك ناۋرىزباي باتىر اۋدانى بويىنشا قورعانىس ىستەر بويىنشا دەپارتامەنتى باستىعىنىڭ ورىنباسارى زاپاستاعى مايور ەرجان الينوۆتىڭ دا ايتار تىلەگىنە قۇلاق ءتۇردى. اتا-انالار اتىنان ءسوز سويلەۋ قۇرمەتىن ەرعوجا شەرەحانوۆ جانە ۇلمەكەن ەرجانوۆا اپاي يەلەندى.
اتا-انالاردىڭ جۇرەگىندەگى سوزدەردى جەتكىزگەن ەرعوجا اعامىزدىڭ ۇلى قاتارداعى جاۋىنگەر نۇرسۇلتان ابىلاي:
- مەن ءوزىمنىڭ قارۋلاستارىمدى بەرگەن سەرتىمىزگە ادال بولىپ، تاباندىلىقپەن، ەرجۇرەكتىلىكپەن بورىشىمىزدى وتەۋگە شاقىرامىن. انت قابىلداۋ – بارشامىز ءۇشىن ماڭىزدى كۇن. ەلىم دەيتىن ەر بولىپ، قايتپاس قايسار ازامات بولىپ، تەپسە تەمىر ۇزەتىن اسكەري ءومىردىڭ قيىندىعى مەن اۋىرتپالىعىنا شىدايتىن، كەز كەلگەن ۋاقىتتا قولىنا قارۋ الىپ، ەلىن قورعاۋعا دايىن، تۋعان جەرىنىڭ شەكاراسىندا جۇرەتىن ساربازدارعا اينالامىز، - دەدى.
ءيا، وسى ءسات، ساربازدىڭ قاسىندا بولعان اكە جۇزىندەگى ماقتانىش پەن قۋانىشتى بايقاۋ قيىن ەمەس ەدى...
ايتۋ كەرەك، اسكەري ءومىر، شەكارا – كەز كەلگەن شەكاراشىنىڭ بويىنا كۇش قۇيىپ، شابىت سىيلايدى. اقىن ەتەدى. مىنبەرگە نۇرسۇلتانمەن بىرگە كوتەرىلىپ، ارىپتەستەرىن بۇگىنگى مەرەكەسىمەن قۇتتىقتاعان قاتارداعى جاۋىنگەر الەكساندر مالىشەۆ كوپتىڭ الدىندا ولەڭ وقىدى. بۇل – باستاماسى، جاس شەكاراشىنىڭ جاڭادان باستالعان جىر داپتەرىنە الداعى كۇندەرى جاۋھار سوزدەرگە تولىققان ۇستىنە تولىعا تۇسەدى دەگەن سەنىمدەمىز.
...جيىننىڭ سوڭى تولىققاندى شەكاراشى اتانعان ساربازداردىڭ سالتاناتتى شەرۋىنە ۇلاستى. بۇدان ءارى، قالىڭ جۇرتشىلىقتىڭ نازارىنا جاس انشىلەر مەن بيشىلەردىڭ مەرەكەلىك شاعىن كونتسەرتتىك باعدارلاماسى ۇسىنىلدى.
ال ساناۋلى مينۋتتاردان سوڭ رەسپۋبليكانىڭ تۇكپىر-تۇكپىرىنەن جەتكەن قاۋىم تاعاتسىزدانا توسقان ءسات تە تۋىپ، وزدەرىنىڭ وتان وعلانى اتانعان ۇلدارىمەن قاۋىشقان... اتا-انا – ۇلىمەن، اتا-اجە – نەمەرەسىمەن، دوس – ءوزىنىڭ قۇلىن-تايداي تەبىسىپ وسكەن قۇربىسىمەن، بويجەتكەن – سۇيگەن جىگىتىمەن... دەمەك، وسىناۋ قانشاما جۇرەكتى تۋلاتقان ايتۋلى كۇننىڭ ەشقاشان ۇمىتىلمايتىنى، اسىرەسە جاس شەكاراشى ساربازداردىڭ بويىنا ەسەلەپ كۇش قۇياتىنى حاق. ەندەشە، ءسات-ساپار، جاس ساربازدار، ەل تىنىشتىعى وزدەرىڭە امانات!
دينا ليتپين،
"ادىرنا" ۇلتتىق پورتالى
