تايلاند مەملەكەتى قازاقستانمەن ءبىلىم سالاسى بويىنشا سەرىكتەستىك ورناتپاق. بۇل تۋرالى بۇگىن ەلىمىزگە رەسمي ءىس-ساپارمەن كەلگەن دەلەگاتسيا مۇشەلەرى مالىمدەدى، دەپ حابارلايدى “ادىرنا” ۇلتتىق پورتالى.
دەلەگاتسيا قۇرامىندا تايلاند كورولدىگى پارلامەنتتەرىنىڭ دەپۋتاتتارى Acaravat Asvahem, Kanok Wongtrangan, Sakuna Saranun, Pimrapee Phanwichatikul, Sakorn Kiewkhong, قازاقستان رەسپۋبليكاسىنىڭ تايلاند كورولدىگىندەگى ەلشىسىنىڭ كەڭەسشىسى ەرلان تىلەنشيەۆ، Bai Mai Phli مەكتەبىنىڭ باس ديرەكتورى Muammer Taşcı جانە مەكتەپتىڭ قوعاممەن بايلانىس جونىندەگى ءبولىم باسشىسى Pisut Namcharoenchai بولدى. قوناقتار سۋلەيمان دەميرەل اتىنداعى ۋنيۆەرسيتەتتىڭ جۇمىس بارىسىمەن، ءبىلىم باعدارلامالارىمەن تانىستى, عيماراتتى ارالادى.
Bai Mai Phli مەكتەبىنىڭ باس ديرەكتورى دەلەگاتسيانىڭ ۋنيۆەرسيتەتكە ءبىلىم سالاسى بويىنشا سەرىكتەستىك ورناتۋ ماقساتىندا كەلگەنىن ايتتى.
«ءبىز مۇندا ەكى ماقساتپەن كەلدىك. ەڭ الدىمەن، ءبىلىم سالاسى ارقىلى ەكى مەملەكەت اراسىندا التىن كوپىر بولۋدى, قارىم-قاتىناس ورناتۋدى جوسپارلاپ وتىرمىز. ستۋدەنتتەرمەن، وقىتۋشىلارمەن الماسۋ بويىنشا باعدارلامالارىمىز بار. سۋلەيمان دەميرەل ۋنيۆەرسيتەتىمەن سەرىكتەستىك ورناتىپ، ورتاق جوبالاردى جۇزەگە اسىرۋعا دايىنبىز. ەكى ەل اراسىندا بايلانىس ورناتىپ، ءبىلىم سالاسىندا تاجىريبە الماسۋعا نيەتتىمىز», – دەدى Muammer Taşcı.
سدۋ رەكتورى داۆرونجون گايپوۆ جوعارى وقۋ ورنى تاراپىنان ىنتىماقتاستىق ورناتۋعا، ورتاق جوبالار باستاۋعا ءاردايىم اشىق ەكەنىن جەتكىزدى.
”ادىرنا” ۇلتتىق پورتالى
