قىزىلوردا وبلىسى اكىمىنىڭ ورىنباسارى بالجان شامەنوۆا وڭىرلىك كوممۋنيكاتسيالار قىزمەتىنىڭ اقپارات الاڭىندا باق وكىلدەرىمەن ءباسپاسوز كونفەرەنتسياسىن وتكىزدى، دەپ حابارلايدى «ادىرنا» ءتىلشىسى.
«2021 جىلدىڭ ناۋرىز ايىنان باستاپ وبلىس اكىمىنىڭ ورىنباسارى قىزمەتىنە تاعايىندالىپ، ايماقتىڭ الەۋمەتتىك-ەكونوميكالىق دامۋىنا قىزمەت ەتتىم. الەۋمەتتىك سالاعا جاۋاپتى بولعاندىقتان ەڭ اۋەلى دەنساۋلىق ساقتاۋ سالاسىندا پاندەميامەن بەتپە-بەت كەلدىك. مەنىڭ الدىمدا - ادامداردىڭ ءومىرىن ساقتاۋ ءۇشىن ۆاكتسينانىڭ ماڭىزدىلىعىن ءتۇسىندىرۋ جانە شۇعىل تۇردە ەكپە جۇمىستارىن ۇيىمداستىرۋ مىندەتى تۇردى. شۇعىل شارالاردى قابىلداۋدىڭ ناتيجەسىندە قىزىلوردا قالاسىندا 200 توسەك ورىنعا ارنالعان مودۋلدىق جۇقپالى اۋرۋلار اۋرۋحاناسى جۇمىسىن باستادى. نەگىزگى ماماندىعىم قارجىگەر بولعاندىقتان، بيۋدجەتتى جوسپارلاۋ جانە ءتيىمدى جۇمسالۋىنا ەرەكشە ءمان بەردىم. اسىرەسە، اۋرۋحانالارعا قاجەتتى قۇرال-جابدىق ساتىپ الۋعا كوڭىل بولدىك. اكىم ورىنباسارى رەتىندە نەگىزگى جۇمىسىمنىڭ ءبىرى - ەڭبەك داۋلارىن شەشۋ ەدى. كاسىپوداقپەن بىرگە ءتيىمدى شەشىم قابىلداۋ ناتيجەسىندە مۇنايشىلاردىڭ ەڭبەك داۋلارىن رەتتەۋ ماقساتىندا جۇمىسشىلاردىڭ جالاقىسىن ءوسىرۋ تۋرالى كەلىسسوزدەردى ءساتتى جۇرگىزدىك. ەڭبەك نارىعىنا قاتىستى جاستاردىڭ جۇمىسپەن قامتىلۋىنا ەرەكشە ءمان بەرىپ، جۇمىس بەرۋشىلەردىڭ سۇرانىسىنا سايكەس وقۋدى بىتىرگەن ازاماتتاردىڭ 97 پايىزى جۇمىسپەن قامتىلدى»،– دەدى شەنەۋنىك.
سونداي-اق ول جۇمىستان ءوز ەركىمەن كەتكەنىن دە اتاپ ءوتتى.
«وزدەرىڭىز بىلەسىزدەر، نۇرلىبەك ماشبەكۇلى نالىباەۆ وبلىس اكىمى قىزمەتىنە تاعايىندالعان ۋاقىتتان باستاپ، ماعان ەكونوميكا، قارجى سالاسىنا جەتەكشىلىك ەتۋدى قوسىمشا جۇكتەدى. دەگەنمەن، ءساۋىر ايىنان باستاپ تۋعان اعامنىڭ بالاسى اسىلبەك شامەنوۆ قالا اكىمى رەتىندە قىزمەتكە كەلدى. اسىلبەك شامەنوۆتىڭ جالاعاش اۋدانى اكىمى بولعان كەزەڭدە ماعان تىكەلەي باعىنىستىلىعى جوق بولعاندىقتان، بۇل جەردە زاڭعا قايشى ارەكەتتەر ورىن العان جوق. بىراق، ءساۋىر ايىنان باستاپ، قارجى سالاسىنا جەتەكشىلىك ەتەتىندىكتەن جانە جيەنىمنىڭ قالا اكىمى قىزمەتىنە كەلۋى سەبەپتى مەن وبلىس اكىمىنىڭ ورىنباسارى قىزمەتىنەن كەتۋ تۋرالى شەشىم قابىلدادىم. دەگەنمەن، مەن قاي كەزدە دە سىر ەلىنىڭ دامۋىنا بار كۇش-جىگەرىمدى سالۋعا دايىنمىن»،— دەپ ءتۇسىندىردى بالجان شامەنوۆا.
«ادىرنا» ۇلتتىق پورتالى
