نۇرسۇلتان نازارباەۆ حالىقارالىق اۋەجايىنىڭ جۇمىسكەرلەرى ازىق-تۇلىكتى نەسيەگە الۋعا ءماجبۇر. كۇن كورىستەرى ناشارلاپ كەتكەنىنە شاعىمدانعان توپ، شۋ شىعاردى، دەپ حابارلايدى “ادىرنا” ۇلتتىق پورتالى.
ايتۋلارىنشا ايلىقتارى جەتپەيدى. استانا ارناسىنىڭ حابارلاۋىنشا ولار باسشىلىققا اۋىر جۇمىسىمىزدىڭ ادال اقىسىن وتەسە دەپ تالاپ قويعان. 12 ساعات توننا-توننا جۇك ءتۇسىرىپ، بار بولعانى 150 مىڭ تەڭگە ايلىق الادى. ايلىقتى كوتەرۋدى باسشىلىققا تالاپ ەتكەن، بىراق ولار جالاقىعا 7 پايىز عانا قوسقانىنا نارازى.
«ءبىزدىڭ ىستەپ جاتقان ەڭبەگىمىزگە لايىقتى قىلدىرىپ ءبىزدىڭ اقشامىزدى كوتەرىپ بەرسە. بىزگە سول عانا كەرەك. ويتكەنى، بىزدە بالامىز بار، مىنا جەردە كوبىسى كۆارتيرا سنيمات ەتىپ تۇرادى. ءبىز مىسالى قازىر پرودۋكتىنى كاسپي رەدپەن الامىز. ويتكەنى ءبىزدىڭ تاۋىپ جاتقان تابىسىمىز جەتپەيدى. ونى سوسىن اي سايىن 10-15 مىڭنان ءبولىپ تولەيمىز»، - دەيدى جۇك ءتۇسىرۋشى مارات راقىمبەتوۆ.
نارازىلىققا شىققاندار دەنساۋلىعىمىزعا زيان كەلگەنى ءۇشىن دە تولەنەتىن وتەماقى دا ماردىمسىز دەپ وتىر.
ايتۋلارىنشا، باس قالاداعى اۋەجايدا ادام دا، جۇمىس تەحنيكاسى دا جەتىسپەيدى. ونىڭ ۇستىنە جۇمىس ورنىنان بەرىلگەن ارنايى كيىمنىڭ ساپاسى جۇمىس تالابىنا ساي كەلمەيدى دەيدى.
«ءبىر پوچتا بىردەمە قالىپ قويسا، ءبىزدىڭ زارپلاتامىزدان كەسىلەدى. نەگىزى دالنىي ستويانكالار بولادى، تەحنيكا جەتپەيدى، تراكتور جەتپەيدى، نەمەسە ترانسپورتەر جەتپەيدى جىگىتتەردىڭ ءبارى قولمەن تارتادى. ەكى ادام قولمەن ارتادى، پوتومۋ چتو تەحنيكا جەتپەيدى. قىستى كۇنى كۇن تايعاقتا جازدا بەرگەن اياق كيىمدى كيەدى، ول اياق كيىم تايعاناپ، جۇرمەيدى»، - دەيدى جۇك ءتۇسىرۋشى امانگەلدى تۇكەنوۆ.
بەرىلەتىن ارنايى كيىمدەردىڭ رازمەرلەرى دە ساي كەلمەيدى ەكەن. ال، باسقا كيىم كيسە، ايىپپۇل تولەتەتىن كورىنەدى. قىزمەتكەرلەرىنىڭ تالابىن ەستىگەن مەكەمە باسشىلىعى، الەۋمەتتىك كومەكتىڭ بارلىعى جۇمىسشى مەن جۇمىس بەرۋشىنىڭ اراسىنداعى كەلىسىمشارتتا قارالعان دەيدى. ال جالاقى ماسەلەسىن مىندەتتى تۇردە شەشەمىز دەپ ۋادە ەتتى.
«جالاقى جايلى ونى تاعى قاراستىرامىز. بۇل تەك گرۋزششيكتەرگە ەمەس، باسقا سلۋجبالاردىڭ بارلىعىنا قاراستىرۋ كەرەك دەپ ويلايمىز. ويتكەنى بۇل بارلىعىنىڭ سۇراعى، قازىر قىمباتشىلىق. قىمباتشىلىق بارىمىزگە ءتيىپ جاتىر. سول ءۇشىن سونى قاراستىرامىز دەپ ۋادە بەرەمىز»، - دەپ مالىمدەدى ن.نازارباەۆ حالىقارالىق اۋەجايى باسقارما توراعاسىنىڭ ءوندىرىس جونىندەگى ورىنباسارى ەرعازى جولداسوۆ.
اۋىر ەڭبەكپەن ناپاقا تاپقان جۇك تۇسىرۋشىلەر ەڭبەكاقىمىزدى كوتەرىپ، ىڭعايلى جۇمىس كيىمىن بەرسە دەپ وتىر. ونىمەن قوسا، ەمگە قاراجات بولسە دەيدى.
”ادىرنا” ۇلتتىق پورتالى
