2017-2018 جىلدارى «اقپاراتتىق رەسۋرستاردا وبەكتىلەردى تانىمال ەتۋ ءۇشىن جالپىۇلتتىق تىزبەگە ەنگىزىلگەن وبەكتىلەردىڭ 3D مودەلدەرىن قۇرۋ» جوباسىن ىسكە اسىرۋ كەزىندە ۇلتتىق مۋزەي باسشىلىعىنا جانە باسقا دا تۇلعالارعا قاتىستى اسا ءىرى مولشەردە بيۋدجەت قاراجاتىن جىمقىرۋ بويىنشا سوتقا دەيىنگى تەرگەۋ جۇرگىزىلۋدە. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
“ۇلتتىق مۋزەي مەردىگەر ۇيىمدارعا اتالعان جوبا اياسىندا اتقارىلعان جۇمىستار ءۇشىن 1,3 ملرد تەڭگە تولەدى.
سونىمەن قاتار، جۇرگىزىلگەن ساراپتامالىق زەرتتەۋ جۇمىستارىنىڭ ناقتى قۇنى 83,4 ملن تەڭگەنى قۇراعانى انىقتالدى.
وسىلايشا، جۇمىس قۇنى 1,2 ملرد تەڭگەگە نەگىزسىز ۇلعايتىلىپ، مەملەكەتكە اسا ءىرى مولشەردە زالال كەلتىردى”، دەپ جازدى انتيكور.
تەرگەپ-تەكسەرۋ امالدارى جالعاسۋدا.
“ادىرنا” ۇلتتىق پورتالى
