الماتىدا تاعى ءبىر زاڭسىز سالىنعان تۇرعىن ءۇي كەشەنى سۇرىلەدى، - دەپ حابارلايدى "ادىرنا" ءتىلشىسى قالا اكىمدىگىنىڭ ءباسپاسوز قىزمەتىنە سىلتەمە جاساپ.
ناۋرىزباي اۋدانىنداعى «قادام» تۇرعىن ءۇي كەشەنىن بۇزۋ تۋرالى سوت وڭ شەشىم شىعارعانى حابارلاندى. بۇعان دەيىن الماتى قالاسىنىڭ قالا قۇرىلىسىن باقىلاۋ باسقارماسى نىساندا تەكسەرۋ جۇرگىزىپ، ساۋلەت، قالا قۇرىلىسى جانە قۇرىلىس قىزمەتى سالاسىندا بىرقاتار زاڭ بۇزۋشىلىقتاردى انىقتاعان بولاتىن.
«4 قاباتتى كوپقاباتتى تۇرعىن ءۇيدىڭ رۇقسات قۇجاتتارىنسىز قۇرىلىسى باستالدى. تەكسەرۋ ناتيجەسى بويىنشا «قادام تك» جشس-نە قاتىستى اكىمشىلىك حاتتامالار جاسالىپ، كەيىننەن زاڭسىز سالىنعان ءۇيدى بۇزۋ تۋرالى تالاپ-ارىز قوزعالدى. ناتيجەسىندە زاڭسىز سالىنعان نىساندى بۇزۋ تۋرالى تالاپ ارىز قاناعاتتاندىرىلدى. شەشىم زاڭدى كۇشىنە ەنەدى دەپ كۇتىلۋدە»، - دەلىنگەن حابارلامادا.
سونداي-اق اكىمدىك تۇرعىنداردىڭ جىلجىمايتىن مۇلىك ساتىپ الماس بۇرىن سالىنىپ جاتقان ءۇي تۋرالى اقپاراتتى تەكسەرىپ، سەنىم تەلەفونى ارقىلى قۇجاتتار پاكەتىن سۇراي الاتىنىن ەسكە سالدى: +7 (727) 229-81-36.
"ادىرنا" ۇلتتىق پورتالى
