پارا الىپ ۇستالعان مادەنيەت جانە سپورت ۆيتسە-ءمينيسترى ساكەن مۇسايبەكوۆ "بارىس" حوككەي كلۋبىنىڭ باس ديرەكتورى بولىپ تاعايىندالدى، دەپ حابارلايدى "ادىرنا" ۇلتتىق پورتالى.
ءماجىلىس كۋلۋارىندا تۋريزم جانە سپورت ءمينيسترى بۇل جاعدايعا قاتىستى پىكىر ءبىلدىردى.
"زاڭناما اياسىندا بۇگىنگى كۇنى ول كىسىگە سپورت سالاسىندا قىزمەت اتقارۋعا شەكتەۋلەر جوق. حوككەيدىڭ جاعدايىن بىلەسىزدەر. 35 ۇپاي عانا جينادى. ودان بولەك حالىقارالىق جارىستاردا دا وتە تومەن ناتيجە تىركەلدى. قۇرىلتايشىلار كەڭەسىمەن تاعايىندالىپ جاتىر. بىراق مينيسترلىك تاراپىنان 1 جىلعا ناقتى تالاپتار قويىلدى. تاپسىرمالار بەرىلدى. حالىقارالىق ارەنادا جوعارى جوبالارى بار،" - دەدى مينيستر.
ەسكە سالايىق، مادەنيەت جانە سپورت ۆيتسە-ءمينيسترى قىزمەتىن اتقارىپ جۇرگەندە ساكەن مۇسايبەكوۆ 2021 جىلى قىلمىستىق كودەكستىڭ 190-بابى 3-بولىگىنىڭ 1-تارماعى بويىنشا ءىرى كولەمدە الاياقتىق جاسادى دەپ ايىپتالعان بولاتىن. ياعني بۋكمەكەرلىك قىزمەت سالاسىنداعى مۇددەلەرگە قولداۋ كورسەتكەنى ءۇشىن پارا العان دەلىنەدى. ول كىناسىن مويىنداپ، مەملەكەتكە 62 ملن تەڭگە كولەمىندە ايىپپۇل تولەپ قۇتىلعان ەدى. ەندى "بارىس" حوككەي كلۋبىنىڭ باس ديرەكتورى بولىپ تاعايىندالدى.
سونىمەن قاتار ۇلتتىق وليمپيادا كوميتەتىندە قىسقى وليمپيادالىق سپورت تۇرلەرى جونىندەگى ۆيتسە-پرەزيدەنت جانە شايبالى حوككەي فەدەراتسياسىنىڭ باس ديرەكتورى قىزمەتىن دە اتقارادى.