پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين يران-يزرايل تەكەتىرەسىنىڭ قازاقستان ونىمدەرىنىڭ اتالعان وڭىرگە جەتكىزىلۋىنە قالاي اسەر ەتۋى مۇمكىن ەكەنىن ءتۇسىندىردى، دەپ حابارلايدى "ادىرنا".
"قازىر بولجام جاساۋعا ەرتە. جاعداي قالاي وزگەرەتىنىن كۇتىپ وتىرمىز. بەيبىت كەلىسىمگە قول جەتكىزىلەدى دەپ ۇمىتتەنەمىز. نە جوعالتامىز دەگەنگە كەلسەك، بارىنەن بۇرىن يرانعا ازىق-تۇلىك جەتكىزەمىز. بۇل وقيعا ول ساۋداعا اسەر ەتپەيدى دەپ ويلايمىن. قايتكەندە دە حالقىنا ازىق كەرەك، ۇلكەن ەل دەگەن سياقتى. ءبىزدى الاڭداتىپ وتىرعان جالعىز ماسەلە – لوگيستيكا", - دەدى سەرىك جۇمانعارين سەناتتىڭ جالپى وتىرىسىنان كەيىن.
اڭگىمە يران تەمىرجول ارقىلى وتەتىن ترانزيتتىك تاسىمال تۋرالى بولىپ وتىر.
"وڭتۇستىككە اپاراتىن جول يران ارقىلى وتەدى. باسقا تەمىرجول جوق. بىراق ول جولمەن ازىرگە سونشالىق كوپ تاسىمالداپ وتىرعان جوقپىز. ويتكەنى يران تەمىرجولىنىڭ جاعدايى سونشالىق جاقسى ەمەس جانە ستانسا اۋىستىرۋ ماسەلەلەرى بار. دەگەنمەن ۇلكەن جوسپارلارىمىز بولعان. سوندىقتان احۋالدى ءجىتى باقىلايمى", - دەدى ۆيتسە-پرەمەر.
جۇمانعاريننىڭ ايتۋىنشا، ەگەر قاقتىعىس ۇزاققا سوزىلىپ جاتسا، قازاقستاندا بالاما لوگيستيكالىق جولدار قاراستىرىلعان.
"بىزدە بالاما نۇسقالار بار: گرۋزيا ارقىلى شىعۋىمىزعا بولادى، تمتم باعىتى بار، قىتاي پورتتارى ارقىلى دا شىعا الامىز. ءيا، بۇل لوگيستيكانى ءسال كۇردەلەندىرەدى، بىراق ەگەر بۇل جاعداي ۇزاق مەرزىمدى بولىپ كەتسە، باسقا جولدارىن ويلاستىرامىز", – دەپ ءتۇسىندىردى ول.
مينيستر قازىرگى كەزدە ناقتى بولجام ايتۋعا ەرتە ەكەنىن اتاپ ءوتتى. قازاقستان جاعدايدىڭ قالاي ءوربيتىنىن كۇتىپ وتىر.
