اپاتقا ۇشىراعان جولاۋشىلار ۇشاعىنا وق اتۋ تۋرالى بۇيرىق بەرگەن رەسەي كاپيتانى دميتري پالاديچۋكتىڭ تۇسىندىرمە حاتى جاريالاندى، دەپ حابارلايدى "ادىرنا" ۇلتتىق پورتالى.
بۇل تۋرالى Minval باسىلىمى جاريالاعان.
باق-تا تاراعان اقپاراتقا ساي، ء“انونيمدى دەرەككوزدەن” سەنساتسيالىق ماتەريالدار كەلىپ تۇسكەن. ونىڭ ىشىندە كاپيتاننىڭ تۇسىندىرمە حاتى، سونداي-اق ۇشاققا جاسالعان سوققى ساتىندەگى بەينە جانە اۋديوجازبالار بولعان.
تۇسىندىرمە حاتتا ناقتى Embraer 190 ۇشاعى اتالماعان. قۇجاتتا تۇمان سالدارىنان كوزگە كورىنبەگەن “ىقتيمال نىسانا” تۋرالى ايتىلعان. كاپيتان پالاديچۋك بۇل نىسان تۋرالى 51-ديۆيزيانىڭ اسكەري باسقارۋ پۋنكتىنە حابارلاپ، ونىڭ بيىكتىگى مەن جىلدامدىعىن جەتكىزگەن. تەلەفون ارقىلى “نىساندى جويۋ” بۇيرىعىن العاننان كەيىن، وپەراتورعا وق اتۋ تۋرالى پارمەن بەرگەن. ءبىرىنشى زىمىران نىساناعا تيمەگەن سوڭ، ەكىنشى رەت وق اتۋعا بۇيرىق بەرگەن.
The Insider باسىلىمىنىڭ دەرەگىنشە، دميتري پالاديچۋك رەسەيدىڭ اۋە شابۋىلىنا قارسى قورعانىس كۇشتەرىندە، سونىڭ ىشىندە نوۆوسىبىردەگى 14-ارميادا قىزمەت ەتكەن. پالاديچۋك تەلەفون ارقىلى سويلەسكەندە تۇسىندىرمە حاتتىڭ تۇپنۇسقا ەكەنىن راستاعان. سونداي-اق، حاتتاعى وزىنە ءتان جازۋ ءستيلىن، اسىرەسە “يو” ءارپىن ەرەكشە جازۋ مانەرىن مويىنداعان. ازەربايجان باق-تارى جاريالاعان ۆيدەوداعى داۋىس تا پالاديچۋكتىڭ داۋسىمەن سايكەس كەلگەن.
ەسكە سالساق، 2024 جىلدىڭ 25 جەلتوقسانىندا باكۋدەن گروزنىيعا باعىت العان Embraer 190 ۇشاعى اقتاۋ ماڭىندا اپاتقا ۇشىراعان. بورتتا 67 ادام بولعان. تەرگەۋ ناتيجەسى ۇشاقتىڭ “سىرتتان ەنگەن وبەكتىلەردەن” زاقىمدانعانىن انىقتادى.
