تۇركيا پرەزيدەنتى رەجەپ تايىپ ەردوعان فرانتسۋزدىق Leman ساتيرالىق جۋرنالىنىڭ مۇحاممەد پايعامبارعا قاتىستى كاريكاتۋراسىن «ارانداتۋ» دەپ باعالادى، دەپ حابارلايدى "ادىرنا" ۇلتتىق پورتالى.
انكاراداعى ادىلەت جانە دامۋ پارتياسى ء(ادپ) پارلامەنتتىك فراكتسياسىنىڭ جيىنىندا تۇركيا پرەزيدەنتى ءسوز سويلەگەن.
«بۇل – ساتيراعا دا، يۋمورعا دا قاتىسى جوق ارام ارانداتۋ. بۇل ىسكە قاتىسى بار بارلىق ادامدار زاڭ الدىندا جاۋاپ بەرەدى. ءبىز بۇل ماسەلەنى زاڭ اياسىندا مۇقيات باقىلايتىن بولامىز»، – دەپ مالىمدەدى.
پرەزيدەنت سونداي-اق ءادپ بيلىكتە بولعان كەزدە ەشكىمنىڭ ەل ازاماتتارىنىڭ ءدىني سەزىمىن اياقاستى ەتۋگە جول بەرىلمەيتىنىن اتاپ ءوتتى.
تۇركيانىڭ ادىلەت ءمينيسترى يىلماز تۋنچ وسىعان دەيىن جۋرنال رەداكتسياسىنا قاتىستى قىلمىستىق ءىس قوزعالعانىن، قازىردىڭ وزىندە ۇستالعاندار بارىن حابارلادى.
سونىمەن قاتار، ىستامبۇل پروكۋراتۋراسى جۋرنالدىڭ بارلىق تيراجىن اينالىمنان الىپ تاستاۋ جانە باسىلىمنىڭ الەۋمەتتىك جەلىدەگى پاراقشالارىن بۇعاتتاۋ تۋرالى شەشىم قابىلدادى.
ءوز كەزەگىندە Leman جۋرنالىنىڭ وكىلدەرى باسىلىم مۇسىلمانداردىڭ ءدىني سەزىمىن قورلاۋدى كوزدەمەگەنىن، كاريكاتۋرا مازمۇنى بۇرمالانىپ تۇسىنىلگەنىن ايتىپ اقتالدى.
