ەردوعاننىڭ بيلىگى شايقالا باستادى.
سوڭعى اپتادا، تەلەحيكايالارىمەن الەمدى جاۋلاپ العان، تۇرىك ەلى ءتىپتى باسقا مازمۇنداعى حيكاياعا كوڭىل بۇرعان. وسى ەلدەگى ايگىلى سەدات پيكەر ەسىمدى مافيانىڭ بوسسى ءوزىنىڭ YouTube ارناسىندا ەردوعان بيلىگىنىڭ بىلىقتارىن اشكەرەلەيتىن ۇزىن سونار روليكتەر جاريالاي باستادى.
بۇل روليكتەردە تۇرىك بيلىگىندەگى ساياسي ەليتانىڭ مافيامەن، جالپى قىلمىس الەمىمەن بايلانىسى تۋرالى ايتىلادى. تەك مافيامەن بايلانىسى عانا ەمەس، ەليتانىڭ ەل بىلە بەرمەيتىن قىلىقتارىن كورسەتىپ جاتىر. ول ءار اپتا سايىن ءبىر روليكتەن سالىپ، ەلدىڭ «شاشىن تىك تۇرعىزىپ» وتىر دەسەك تە بولادى. از عانا ۋاقىتتىڭ ىشىندە پيكەردىڭ كانالى ەڭ تانىمال بولىپ شىقتى – تەك YouTube-تەگى كورىلىمى ءجۇز ميلليونعا جۋىق.
بۇل روليكتەردە بۇرىنعى جانە كازىرگى مينيسترلەر مەن دەپۋتاتتار، ولاردىڭ كومەكشىلەرى مەن بالالارى قاراپايىم جۇرتتى قالاي توناپ، ادامداردى ءولتىرىپ، زورلىق-زومبىلىققا بارىپ جاتقانى تۋرالى، يگيل تەرروريستەرىمەن مۇناي ساۋداسىن قالاي جۇرگىزىپ وتىرعاندارى، ۆەنەسۋەلادان توننالاپ كوكاين تاسىپ جاتقاندارى تۋرالى ەگجەي-تەگجەي باياندايدى. پيكەر ساياساتكەرلەردىڭ تاپسىرىسى بويىنشا مافيانىڭ جۋرناليستەر مەن بەلسەندىلەردى قالاي ولتىرگەنى تۋرالى دا، مافيا باسشىلارىن وسىنداي كومەگى ءۇشىن قىلمىستىق جاۋاپتان دا، تۇرمەدەن دە بوساتىپ جاتقانى تۋرالى ايتىپ بەردى.
پيكەردىڭ ءوزى دە تۇرمەدەن سولاي بوساپ شىققان. ونىڭ اڭگىمەسىنە قاراپ، تۇرىك جۇرتشىلىعى ەردوعان قۇرعان بيلىكتىڭ قانشالىقتى ءشىرىپ كەتكەنىن ۇققانداي بولدى. بۇل بيلىكتىڭ باسىندا وڭكەي ۇرى مەن ادام ولتىرگىش قانىپەزەرلەر، الاياقتار وتىرعانىن ءبىلدى. جۇك فۋرالارىنا ارەڭ سىيعىزارىن دوللارلارىن قايدا جۇمسارىن بىلمەيدى دەيدى مافيوزي. سوندا دا ەلدى توناۋىن توقتاتا الار ەمەس دەپ ناليدى.
ول، ازىرگە، ءدال ەردوعاننىڭ ءوزى تۋرالى ەشتەڭە ايتپاسا دا، بۇكىل ەل وسى شوۋدىڭ سوڭعى بولىمدەرىندە ول تۋرالى دا ەستىپ قالارمىز دەپ كۇتىپ وتىرعان كورىنەدى. پيكەر روليكتەرىنىڭ جالپى سانى ون ەكى سەريا بولادى دەگەن، كازىر سەگىزى جارىققا شىعىپ ۇلگەردى. تۇرىك جۋرناليستەرى مۇندا ايتىلعان فاكتىلەردى تەكسەرىپ، شىندىققا جاناساتىنىن مالىمدەدى. ەل-جۇرت تا سەنىپ وتىر. روليككە ىلىككەن ساياساتكەرلەر ەل الدىندا دەرەۋ جەكسۇرىنعا اينالىپ جاتىر. وپپوزيتسيا دا بۇنى ءوز ىڭعايىنا پايدالاباقشى. ولار كەزەكتەن تىس سايلاۋ وتكىزۋ كەرەك دەپ مالىمدەدى. ەردوعان مەن ونىڭ پارتياسىنىڭ رەيتينگى قۇلدىراپ كەتتى. ەلدىڭ ءىشى قايناعان قازانداي، ساياسي تەمپەراتۋرا كوتەرىلىپ بارادى. ەردوعاننىڭ بيلىكتەن ايىرىلعىسى جوق.
دەموكراتيانى قۋعىنعا سالىپ، ناعىز ديكتاتورلىق قاھارىنا مىنە مە، جوق پا، ونى الداعى كۇندەرى بىلە جاتارمىز. ايتسە دە، تۇرىك قوعامى ونى ءارى قاراي بيلىكتە قالدىرا قويماس.
قانشا دەگەنمەن، قازاقستاننىڭ كونبىس حالقى ەمەس، بيلىكتىڭ ەسۋاستىعىنا دا، ساتقىندىعى مەن جەمقورلىعىنا دا كوز جۇمىپ، توزە بەرەتىن. ەردوعاننىڭ جاعدايى كۇرت قيىنداپ كەتتى. ەكونوميكاسى دا ءماز ەمەس، ليرا قۇلدىراۋى جاعىنان الەمدەگى الدىڭعى قاتاردا تۇر. تۇرىك پرەزيدەنتى تەك تاعىنان عانا ايىرىلىپ قويماي، تۇرمەگە قامالىپ جاتسا تاڭ قالماڭىز.
"ادىرنا" ۇلتتىق پورتالى
