Ashat Asan: Erdoǵannyń bıligi shaıqalyp jatyr

5971
Adyrna.kz Telegram
Erdoǵannyń bıligi shaıqala bastady.
Sońǵy aptada, telehıkaıalarymen álemdi jaýlap alǵan, túrik eli  tipti basqa mazmundaǵy hıkaıaǵa kóńil burǵan. Osy eldegi áıgili Sedat Pıker esimdi mafııanyń bossy óziniń YouTube arnasynda Erdoǵan bıliginiń bylyqtaryn áshkereleıtin uzyn sonar rolıkter jarııalaı bastady.
Bul rolıkterde túrik bıligindegi saıası elıtanyń mafııamen, jalpy qylmys álemimen baılanysy týraly aıtylady. Tek mafııamen baılanysy ǵana emes, elıtanyń el bile bermeıtin qylyqtaryn kórsetip jatyr. Ol ár apta saıyn bir rolıkten salyp, eldiń «shashyn tik turǵyzyp» otyr desek te bolady. Az ǵana ýaqyttyń ishinde Pıkerdiń kanaly eń tanymal bolyp shyqty – tek YouTube-tegi kórilimi júz mıllıonǵa jýyq.
Bul rolıkterde burynǵy jáne kázirgi mınıstrler men depýtattar, olardyń kómekshileri men balalary qarapaıym jurtty qalaı tonap, adamdardy óltirip, zorlyq-zombylyqqa baryp jatqany týraly, IGIL terrorısterimen munaı saýdasyn qalaı júrgizip otyrǵandary, Venesýeladan tonnalap kokaın tasyp jatqandary týraly egjeı-tegjeı baıandaıdy. Pıker saıasatkerlerdiń tapsyrysy boıynsha mafııanyń jýrnalıster men belsendilerdi qalaı óltirgeni týraly da, mafııa basshylaryn osyndaı kómegi úshin qylmystyq jaýaptan da, túrmeden de bosatyp jatqany týraly aıtyp berdi.
Pıkerdiń ózi de túrmeden solaı bosap shyqqan. Onyń áńgimesine qarap, túrik jurtshylyǵy Erdoǵan qurǵan bıliktiń qanshalyqty shirip ketkenin uqqandaı boldy. Bul bıliktiń basynda óńkeı ury men adam óltirgish qanypezerler, alaıaqtar otyrǵanyn bildi. Júk fýralaryna áreń syıǵyzaryn dollarlaryn qaıda jumsaryn bilmeıdi deıdi mafıozı. Sonda da eldi tonaýyn toqtata alar emes dep nalıdy.
Ol, ázirge, dál Erdoǵannyń ózi týraly eshteńe aıtpasa da, búkil el osy shoýdyń sońǵy bólimderinde ol týraly da estip qalarmyz dep kútip otyrǵan kórinedi. Pıker rolıkteriniń jalpy sany on eki serııa bolady degen, kázir segizi jaryqqa shyǵyp úlgerdi. Túrik jýrnalısteri munda aıtylǵan faktilerdi tekserip, shyndyqqa janasatynyn málimdedi. El-jurt ta senip otyr. Rolıkke ilikken saıasatkerler el aldynda dereý jeksurynǵa aınalyp jatyr. Oppozıııa da buny óz yńǵaıyna paıdalabaqshy. Olar kezekten tys saılaý ótkizý kerek dep málimdedi. Erdoǵan men onyń partııasynyń reıtıngi quldyrap ketti. Eldiń ishi qaınaǵan qazandaı, saıası temperatýra kóterilip barady. Erdoǵannyń bılikten aıyrylǵysy joq.
Demokratııany qýǵynǵa salyp, naǵyz dıktatorlyq qaharyna mine me, joq pa, ony aldaǵy kúnderi bile jatarmyz. Áıtse de, túrik qoǵamy ony ári qaraı bılikte qaldyra qoımas.
Qansha degenmen, Qazaqstannyń kónbis halqy emes, bıliktiń esýastyǵyna da, satqyndyǵy men jemqorlyǵyna da kóz jumyp, tóze beretin. Erdoǵannyń jaǵdaıy kúrt qıyndap ketti. Ekonomıkasy da máz emes, lıra quldyraýy jaǵynan álemdegi aldyńǵy qatarda tur. Túrik prezıdenti tek taǵynan ǵana aıyrylyp qoımaı, túrmege qamalyp jatsa tań qalmańyz.
"Adyrna" ulttyq portaly 
Pikirler