قازاقستاندا مەرزىمدى اسكەري قىزمەتشىلەرگە نەسيە الۋعا شەكتەۋ ەنگىزىلۋى مۇمكىن، دەپ حابارلايدى "ادىرنا" ۇلتتىق پورتالى.
قارجى نارىعىن رەتتەۋ جانە دامىتۋ اگەنتتىگى وسى باعىتتا ارنايى قاۋلى جوباسىن ازىرلەدى.
جاڭا قۇجاتقا سايكەس، مەرزىمدى اسكەري قىزمەتكە شاقىرىلعان ازاماتتارعا بانكتەر مەن ميكروقارجى ۇيىمدارى نەسيە جانە ميكرونەسيەلەر بەرۋدەن باس تارتۋعا مىندەتتى بولادى. بۇل وزگەرىستەر كرەديتتىك ەسەپ جۇرگىزۋ جانە اقپارات الماسۋ قاعيدالارىنا ەنگىزىلەدى.
«كرەديتتىك بيۋرولار جراج يش جۇيەسى ارقىلى اسكەري بورىشىن وتەپ جۇرگەن ازاماتتار تۋرالى مالىمەتتەردى العان كەزدە، ولاردىڭ كرەديتتىك ەسەبىندە «مەرزىمدى اسكەري قىزمەتتىڭ اسكەري قىزمەتشىسى» مارتەبەسى كورسەتىلەدى. وسى مارتەبە بولعان جاعدايدا، بانكتەر مەن ميكروقارجى ۇيىمدارى ولارعا جاڭا قارىز بەرۋگە قۇقىلى ەمەس»، – دەلىنگەن اگەنتتىكتىڭ تۇسىندىرمەسىندە.
قاۋلى كۇشىنە ەنسە، بۇل وزگەرىس مەرزىمدى اسكەري قىزمەتكە شاقىرىلعان قازاقستاندىقتاردىڭ قارجىلىق مىندەتتەمەلەرىن باقىلاۋعا، قاجەتسىز قارىزعا باتىپ كەتۋدەن ساقتاۋعا باعىتتالادى.
ايتا كەتەيىك، سوڭعى جىلدارى اسكەر قاتارىندا قىزمەتىن وتەپ ءجۇرىپ قازا تاپقان ساربازداردىڭ اتا-انالارى بالالارىنىڭ اسكەردە ءجۇرىپ نەسيە راسىمدەگەنىن ايتىپ، دابىل قاعىپ كەلەدى. الىمجەتتىك پەن قارجىلىق قارىز ماسەلەسى قاتار تالقىلاناتىن وزەكتى پروبلەماعا اينالدى.
مامانداردىڭ پىكىرىنشە، جاڭا شەكتەۋ اسكەردەگى جاستاردىڭ الەۋمەتتىك-قارجىلىق قاۋىپسىزدىگىن قامتاماسىز ەتۋگە ىقپال ەتەدى.
