اقش-تىڭ تەحاس شتاتىندا ورىن العان جويقىن سۋ تاسقىنى سالدارىنان قازا تاپقاندار سانى 50 ادامعا جۋىقتادى, دەپ حابارلايدى “ادىرنا” ۇلتتىق پورتالى.
كەرر وكرۋگىندە 43 ادامنىڭ ءمايىتى تابىلعان، ولاردىڭ 28-ءى ەرەسەك، 15-ءى – بالالار. بۇل تۋرالى 5 شىلدە كۇنى كەشكىسىن وتكەن ءباسپاسوز ءماسليحاتىندا وڭىرلىك شەريف لارري لەيتا مالىمدەدى.
سونىمەن قاتار، بەرنەت وكرۋگىندە – 3, ال ترەۆيس وكرۋگىندە – 4 ادام قايتىس بولعانى راستالدى.
27 قىز بالا ءىز-ءتۇزسىز جوعالعان, ال كەيبىر قازا تاپقان ازاماتتاردىڭ تۇلعاسى ءالى انىقتالعان جوق. قۇتقارۋ جۇمىستارىنا 500-گە جۋىق مامان مەن 14 تىكۇشاق, سونداي-اق تەحاس ۇلتتىق گۆاردياسى مەن اقش جاعالاۋ كۇزەتى جۇمىلدىرىلعان.
تابيعي اپات كەزىندە گۋادالۋپە وزەنىنىڭ جاعاسىندا ورنالاسقان جازعى لاگەردە دەمالىپ جاتقان 750-گە جۋىق قىزدىڭ كوبى قۇتقارىلعان, ال لاگەر قىزمەتكەرلەرىن قوسقاندا 850 ادام قاۋىپسىز جەرگە ەۆاكۋاتسيالانعان.
سۋ دەڭگەيى نەبارى 45 مينۋت ىشىندە 8 مەترگە كوتەرىلگەن. كۋاگەرلەردىڭ ايتۋىنشا، تاسقىن سۋ اعاشتاردىڭ ۇشار باسىنا دەيىن جەتكەن، ال لاگەر اسحاناسىنىڭ ءبىر قابىرعاسىن تۇگەلدەي قيراتىپ كەتكەن.
وقيعادان كەيىن دونالد ترامپتىڭ اكىمشىلىگى سىنعا ۇشىرادى. عالىمدار مەن توتەنشە جاعدايلار ماماندارى پرەزيدەنتتى NOAA (اقش-تىڭ اۋا رايى مەن تابيعي اپاتتارعا جاۋاپتى باسقارماسى) قىزمەتكەرلەرى مەن قارجىسىن قىسقارتقانى ءۇشىن ايىپتادى. سونداي-اق، ترامپ كليماتتىڭ وزگەرۋىنە قاتىستى عىلىمي دەرەكتەردى جوققا شىعارعان بولاتىن.
تاۋەلسىزدىك كۇنىنە تۋرا كەلگەن بۇل اپاتتىڭ سەبەبى رەتىندە تولاسسىز جاڭبىر اتالدى. كەرر وكرۋگىندە جاۋىن-شاشىن مولشەرى ءبىر شارشى مەترگە 300 ليترگە جەتكەن, بۇل – جىلدىق نورمانىڭ ۇشتەن ءبىر بولىگىنە تەڭ.
ۇلتتىق مەتەورولوگيالىق قىزمەت (NWS) الداعى كۇندەرى وڭىردە تاعى دا قاتتى جاۋىن مەن جەرگىلىكتى دەڭگەيدەگى اپاتتىق سۋ تاسقىندارى بولۋى مۇمكىن ەكەنىن ەسكەرتۋدە. جاڭا تاسقىندار باستالىپ كەتكەن. تۇرعىندارعا بيىك جەرگە كوشۋ جانە جەدەل ارەكەت ەتۋ ۇسىنىلعان.
