اقش پرەزيدەنتى دونالد ترامپ اق ۇيدەگى پرەزيدەنتتىڭ كادر ساياساتى جونىندەگى باسقارماسىنىڭ ديرەكتورى ەتىپ تاعايىنداعان سەردجيو گور وزبەك كسر-ىندە دۇنيەگە كەلگەن، دەپ حابارلايدى "ادىرنا" ۇلتتىق پورتالى Times of Malta جانە OCCRP سايتتارىنا سىلتەمە جاساپ.
«سەردجيو گور اق ۇيدەگى كادرلىق تاعايىنداۋلار باسقارماسىنىڭ ديرەكتورى بولىپ تاعايىندالعاندا، ءبىر اقپارات قۇرالى ونى ء“سىز ەشقاشان ەستىمەگەن ەڭ ىقپالدى ادام” دەپ سيپاتتاعان ەدى. سوڭعى جىلدارى گوردىڭ ەسىمى ءجيى اتالا باستادى، سەبەبى ول ترامپ اكىمشىلىگىنە مىڭداعان شەنەۋنىكتى تاعايىنداۋ پروتسەسىن باسقارۋدى جالعاستىردى. الايدا ونىڭ ءومىربايانىنا قاتىستى كوپتەگەن دەرەك جاريا بولعانىمەن، تۋعان جەرى جايلى اقپارات سول كۇيى بەلگىسىز قالعان ەدى»، – دەپ جازادى OCCRP ءوز ماتەريالىندا.
New York Post باسىلىمىنا بەرگەن سۇحباتىندا گور تۋعان ەلىن اتاۋدان باس تارتقانىمەن، «بۇل رەسەي ەمەس» دەپ قىسقا قايىرعان. الايدا Times of Malta مەن OCCRP مالتاداعى جىلجىمايتىن مۇلىككە قاتىستى نوتاريالدىق قۇجاتتار ارقىلى ونىڭ تۋعان جەرىن انىقتادى. قۇجاتتارعا سايكەس، گور كەم دەگەندە بالالىق شاعىنىڭ 5 جىلىن مالتادا وتكىزگەن جانە ول 1986 جىلى 30 قاراشادا تاشكەنتتە دۇنيەگە كەلگەن. ول كەزدە
گور 2021 جىلى اناسىنان مالتاداعى مۇلىكتى 268 مىڭ دوللارعا ساتىپ العان. نوتاريالدىق اكتىدە ونىڭ تۋعان جەرى قازىرگى وزبەكستان استاناسى دەپ كورسەتىلگەن. ادۆوكاتىنىڭ ايتۋىنشا، ول مالتاعا بالا كۇنىندەگى ەستەلىكتەرى مەن وسى جەرگە دەگەن سۇيىسپەنشىلىگى ءۇشىن ورالعان.
بالالىق شاعىندا گوردىڭ وتباسى اقش-قا كوشىپ، كەيىن ول امەريكالىق ازاماتتىق العان. ساياسي مانسابىن باستاپ، رەسپۋبليكالىق پارتيا وكىلى سەناتور رەند پولدىڭ كەڭسەسىندە جۇمىس ىستەدى. 2020 جىلى ترامپتىڭ قايتا سايلانۋ ناۋقانىنداعى قارجىلىق كوميتەتتىڭ اپپارات جەتەكشىسى قىزمەتىن اتقارعان. سول جىلى ترامپ سايلاۋدا جەڭىلىپ قالعان ەدى. سونىمەن قاتار گور دونالد ترامپتىڭ ۇلىمەن بىرگە كونسەرۆاتيۆتىك باعىتتاعى Winning Team Publishing باسپاسىن قۇرعان.
گور بىرنەشە رەت ماسكەۋگە دە بارعان. 2018 جىلى ۆاشينگتونداعى ليبەرتارياندىق تالداۋ ورتالىعى قارجىلاندىرعان ساپارىندا اقش پەن رەسەي اراسىنداعى قارىم-قاتىناستى تالقىلاۋعا ارنالعان تانىسۋ ميسسياسىنا قاتىسقان. ال 2017 جىلى رەسەيدىڭ مەملەكەتتىك «اەروفلوت» اۋە كومپانياسىمەن ماسكەۋگە بارىپ، كەلەسى كۇنى ريمگە ۇشىپ كەتكەن.
