وزبەكستاندا 19 جاستاعى جىگىت وزبەكستان پرەزيدەنتىنە جاعىمسىز پىكىر جازعانى ءۇشىن باس بوستاندىعىنان ايىرىلدى، دەپ حابارلايدى "ادىرنا" ءتىلشىسى gazeta.uz باسىلىمىنا سىلتەمە جاساي وتىرىپ.
Instagram جەلىسىندەگى پىكىرى ءۇشىن وزبەكستان ازاماتى ەكى جارىم جىلعا باس بوستاندىعىنان ايىرىلدى. جەلى قولدانۋشىسى مەملەكەت باسشىسى شاۆكات ميرزيەەۆكە جاعىمسىز پىكىر جازعان.
26 قازاندا سامارقاند وبلىسىنىڭ قاتتاقۇرعان اۋداندىق قىلمىستىق ىستەر جونىندەگى سوتى 19 جاسار ديلشود يسكانداروۆتى قك-ءنىڭ 158-بابىنىڭ 3-بولىگى بويىنشا "وزبەكستان رەسپۋبليكاسىنىڭ پرەزيدەنتىنە قاتىستى كوپشىلىك الدىندا قورلاۋ نەمەسە جالا جابۋ" بويىنشا كىنالى دەپ تانىدى.
سوت جازدىڭ باسىندا يسكانداروۆ پرەزيدەنت شاۆكات ميرزيەەۆ تۋرالى Instagram جەلىسىندەگى "President family" (رەد. - پرەزيدەنت وتباسى) بەينەبايانىنىڭ استىندا پىكىر قالدىرعانىن انىقتادى.
سوتتالۋشى ءوز كىناسىن مويىنداپ، تانىستارىنىڭ كەڭەسى بويىنشا جازىلعان پىكىردى الىپ تاستاعانىن ايتتى. بىراق ءبىراز ۋاقىتتان كەيىن وعان قارسى قىلمىستىق ءىس قوزعالعان.
"ول شاۆكات ميرزيەەۆتىڭ ساياساتىنا قارسى ەمەس ەكەنىن مالىمدەدى، بىراق جاستىعى مەن تۇسىنىسپەۋشىلىگىنە بايلانىستى پرەزيدەنت تۋرالى قورلايتىن سوزدەر جازدى", — دەلىنگەن سوت شەشىمىندە.
سوتتالۋشى تولىعىمەن وكىنىپ، سوتتان جازانى جەڭىلدەتۋدى سۇرادى. سوعان قاراماستان سوت ونى كىنالى دەپ تانىپ، ەكى جارىم جىلعا باس بوستاندىعىنان ايىردى.
