Ózbekstanda 19 jastaǵy jigit Ózbekstan prezıdentine jaǵymsyz pikir jazǵany úshin bas bostandyǵynan aıyryldy, dep habarlaıdy "Adyrna" tilshisi gazeta.uz basylymyna silteme jasaı otyryp.
Instagram jelisindegi pikiri úshin Ózbekstan azamaty eki jarym jylǵa bas bostandyǵynan aıyryldy. Jeli qoldanýshysy memleket basshysy Shavkat Mırzıeevke jaǵymsyz pikir jazǵan.
26 qazanda Samarqand oblysynyń Qattaqurǵan aýdandyq qylmystyq ister jónindegi soty 19 jasar Dılshod Iskandarovty QK-niń 158-babynyń 3-bóligi boıynsha "Ózbekstan Respýblıkasynyń Prezıdentine qatysty kópshilik aldynda qorlaý nemese jala jabý" boıynsha kináli dep tanydy.
Sot jazdyń basynda Iskandarov Prezıdent Shavkat Mırzıeev týraly Instagram jelisindegi "President family" (red. - Prezıdent otbasy) beınebaıanynyń astynda pikir qaldyrǵanyn anyqtady.
Sottalýshy óz kinásin moıyndap, tanystarynyń keńesi boıynsha jazylǵan pikirdi alyp tastaǵanyn aıtty. Biraq biraz ýaqyttan keıin oǵan qarsy qylmystyq is qozǵalǵan.
"Ol Shavkat Mırzıeevtiń saıasatyna qarsy emes ekenin málimdedi, biraq jastyǵy men túsinispeýshiligine baılanysty Prezıdent týraly qorlaıtyn sózder jazdy", — delingen sot sheshiminde.
Sottalýshy tolyǵymen ókinip, sottan jazany jeńildetýdi surady. Soǵan qaramastan sot ony kináli dep tanyp, eki jarym jylǵa bas bostandyǵynan aıyrdy.
