اباي وبلىسى شار قالاسىنداعى پوليتسيا بولىمىندە تۇسىرىلگەن دەلىنگەن بەينەجازبا الەۋمەتتىك جەلىدە قىزۋ تالقىلانىپ جاتىر، دەپ حابارلايدى "ادىرنا" ۇلتتىق پورتالى.
وندا ازاماتتىق كيىمدەگى ەر ادامنىڭ پوليتسيا فورماسىنداعى قىزمەتكەرلەرگە روگاتكامەن ۇقساس قۇرال ارقىلى وق اتىپ جاتقانى انىق كورىنەدى.
بەينەجازبادا ءتارتىپ ساقشىلارىنىڭ قارسىلىق كورسەتپەستەن قاشىپ بارا جاتقانى، ال اتقىلاۋشى ادامنىڭ كۇلكىگە كەنەلىپ تۇرعانى بەينەلەنگەن.
جازبا اۆتورىنىڭ مالىمدەۋىنشە، روگاتكا ۇستاعان ەر ادام – پودپولكوۆنيك شەنىندەگى ءبولىم باسشىسى، ال وق جاۋدىرۋ – ونىڭ "تاربيەلەۋ ءادىسى" بولعان.
"قولاستىنداعىلارعا اڭشى سياقتى وق اتادى. كۇلەدى. بۇنى تاربيەلەۋ دەپ ايتۋعا كەلە مە؟ بۇل – بيلىككە ماستانۋ", – دەلىنگەن جازبادا.
وسى جاعدايعا بايلانىستى اباي وبلىستىق پوليتسيا دەپارتامەنتى رەسمي تۇسىنىكتەمە بەردى. ۆەدومستۆونىڭ حابارلاۋىنشا، قىزمەتتىك تەرگەۋ تاعايىندالىپ، وقيعا ورنىنا جەكە قۇرام ينسپەكتسياسى جىبەرىلگەن.
"اباي وبلىستىق پوليتسيا دەپارتامەنتىنىڭ جەكە قۇرام ينسپەكتسياسى اتالعان فاكتى بويىنشا وقيعا ورنىنا بارىپ، قىزمەتتىك تەرگەۋ تاعايىندادى. ناتيجەسىنە قاراي زاڭ اياسىندا شەشىم قابىلدانادى", – دەپ مالىمدەدى دەپارتامەنتتىڭ ءباسپاسوز قىزمەتى.
