ۇلىتاۋ وبلىسىنداعى شابدەن ەراليەۆ اۋىلىنىڭ تۇرعىندارى قىمىزدان كول-كوسىر پايدا تاۋىپ وتىر. ەلدى مەكەندەگى 265 ءۇي تۇگەل بيە بايلايدى. وسىنىڭ ناتيجەسىندە ەلدىڭ ىرىسى ارتىپ، قازاقستانداعى ۇزدىك 30 اۋىلدىڭ قاتارىنا كىرگەن.
ەجەلدەن بالداي قىمىزىمەن تانىلعان جاڭاارقا دالاسىندا جىلقىنىڭ سانى 100 مىڭعا جۋىقتايدى. سونىڭ بەستەن ءبىر بولىگى وسى ەراليەۆ اۋىلىنا تيەسىلى. مۇنداعى ءار شاڭىراق كەم دەگەندە ءبىر ءۇيىر بيە بايلايدى. كوكتەمدە، اسىرەسە، كۇزگە سالىم ءشوپ پىسكەندە قىمىز ساۋداسى قىزادى.
«وسى كوشەدە كەزىندە جالعىز-اق ايعىر بولادى ەكەن، 20-30 ۇيدە ءبىر بيە، ەكى بيەدەن بولادى ەكەن. قازىر ەندى ءۇي باسى 2,3, 4 ۇيىردەن، 5 ۇيىردەن، ودان دا كوپ تىرشىلىك قىپ وتىرعان ازاماتتار بار. ازىق قىلادى، ساتادى. وسىدان اماندىق بولسا قازاننىڭ بىرىنە دەيىن قىمىز ساۋادى»،—دەيدى اۋىل تۇرعىنى شۋباي نۇرجانباەۆ.
بەردەن جۇماباەۆ قازىردىڭ وزىندە كۇنىنە 100 ليتر قىمىز ساتىپ وتىر. ول 30 جىلدان بەرى وسى جىلقى شارۋاشىلىعىمەن اينالىسادى.
«اسىرەسە جاڭاارقا اۋدانىندا جەڭىس پەن ەراليەۆ، اقتۇبەك سوۆحوزدارى جاقسى جىلقىنى بايلايدى. بۇل جاقتا بيە بايلامايتىن ءۇي بولمايدى. جان-جاققا قىمىز وتكىزەمىز. ءوزىمىزدىڭ ۇيرەنگەن تۇتىنۋشىلارىمىز بار»،—دەيدى ول.
اۋىل تۇرعىندارى قىمىز ساتۋ ءۇشىن الىسقا بارمايدى. تاپسىرىس بەرىپ، ۇيدەن الىپ كەتەتىن تۇتىنۋشىلار قاتارى كوپ. ودان قالدى ىرگەدەن تەمىرجول جەلىسى مەن قاراعاندى – جەزقازعان تراسساسى وتەدى.
"قىمىزىڭ ءدامدى بولسا، جارنامانىڭ دا قاجەتى جوق. توبىلعىمەن ماي جايىپ ىستايمىز. قۇيعان سايىن 100-دەن پىسەمىز. كەشكە جاتاردا مىڭ پىسەمىز، تاڭەرتەڭ مىڭ پىسەمىز. سوسىن مۇزداتىپ وتىرامىز. سوندا قىمىز بالداي ءتاتتى بولادى",-دەيدى اۋىل تۇرعىنى شولپان سابىرباەۆا.
مال شارۋاشىلىعىنىڭ ماشاقاتى كوپ. دەگەنمەن، ەراليەۆ تۇرعىندارى اتا كاسىپتەن قول ۇزبەك ەمەس. كەرىسىنشە، قىمىز ساۋداسى قىزعان سايىن بىرىنەن بىرى اسىپ بيە بايلاۋعا كوشكەن. وسىنىڭ ناتيجەسىندە تۇرمىسى تۇزەلىپ، 2021 جىلى ەراليەۆ اۋىلى قازاقستانداعى ۇزدىك 30 اۋىلدىڭ قاتارىنا كىردى. 2 مىڭنان استام تۇرعىنى بار اۋىلدا بۇگىندە بىردە-ءبىر جۇمىسسىز تىركەلمەگەن.
