اباي وبلىسى گەولوگيالىق بارلاۋ كوللەدجىندە II رەسپۋبليكالىق جاس گەولوگتاردىڭ دالالىق وليمپياداسى ءوز مارەسىنە جەتتى. وليمپياداعا ەلىمىزدىڭ ءار وڭىرىنەن 15 كوماندا قاتىسىپ، 9–11 سىنىپ وقۋشىلارى گەولوگيا سالاسىنداعى بىلىمدەرىن تاجىريبە جۇزىندە شىڭدادى. قاتىسۋشىلار دالالىق لاگەر قۇرۋدان باستاپ، مينەرالوگيا، پالەونتولوگيا، گيدروگەولوگيا، شليحتى سىناما الۋ، گەولوگيالىق قيما جاساۋ سياقتى باعىتتار بويىنشا سايىسقا ءتۇستى.
وليمپيادانىڭ سالتاناتتى جابىلۋ راسىمىنە قر يندۋستريا جانە قۇرىلىس مينيسترلىگىنىڭ گەولوگيا كوميتەتىنىڭ توراعاسى ەرلان اقباروۆ، قر ۇعا اكادەميگى سەرىكبەك داۋكەەۆ، سونداي-اق اباي وبلىسى ءبىلىم باسقارماسى باسشىسىنىڭ م.ا. باۋىرجان تۋلەنوۆ قاتىستى.
ءبىر اپتاعا سوزىلعان بايقاۋدىڭ قورىتىندىسى بويىنشا استانا قالاسىنىڭ «التاير» كومانداسى I ورىنعا يە بولدى.
قازاقستان قۇراماسىنىڭ «اسپان» كومانداسى II ورىندى ەنشىلەسە، قوستاناي قالاسىنىڭ «گەوبايت» كومانداسى III ورىنعا لايىق دەپ تانىلدى.
وليمپيادادا ەرەكشە كوزگە تۇسكەن وقۋشىلار جەكە نوميناتسيالارمەن ماراپاتتالدى. «ۇزدىك جاس گەولوگ» اتاعى:
1-ورىن الينا بلوحينا (قوستاناي وبلىسى)
2-ورىن ارتەم ترەششەۆ (قر قۇراما كومانداسى)
3-ورىن ەركەناز ورازالى (استانا قالاسى)
بىرقاتار قاتىسۋشى ەلىمىزدىڭ جەتەكشى تەحنيكالىق جوعارى وقۋ ورىندارىنىڭ ءبىلىم گرانتتارىنا يە بولدى:
كبتۋ گرانتى «جەتىسۋ» كومانداسىنىڭ مۇشەسى، تالدىقورعان قالاسىنان كەلگەن باقبەرگەن بەكارىسقا تابىستالدى;
Satbayev University گرانتىن بلوحينا الينا (قوستاناي), دەينو پلاتون (سەمەي), جۇماشەۆ ءاليحان جانە وماروۆ اسلان (استانا) يەلەندى;
قارتۋ گرانتى اقتوبەدەن كەلگەن سولوۆەنكو انناعا بۇيىردى.
جاس گەولوگتاردىڭ بايقاۋى گەولوگيا كوميتەتىنىڭ باستاماسىمەن، سونداي-اق Kazakhmys, ERG, Kazzinc, Yer-Tai, گەوكەن، «الەل» قيك، ەمبامۋنايگاز، ProLabSupport, Solidcore Resources سياقتى سالا سەرىكتەستەرىنىڭ قولداۋىمەن ۇيىمداستىرىلدى.
