بەلگىلى عارىشكەر تالعات مۇساباەۆ 75 جاسقا قاراعان شاعىندا ومىردەن ءوتتى، دەپ حابارلايدى «ادىرنا» ءتىلشىسى.
مەملەكەت باسشىسى قاسىم-جومارت توقاەۆ حالىق قاھارمانىنىڭ وتباسىنا كوڭىل ايتتى.
«تالعات امانگەلدىۇلى ءۇش مارتە عارىشتى باعىندىرعان، اشىق كوسموسقا شىعىپ، ايتۋلى ەرلىگىمەن ەلىمىزدىڭ اتىن الەمگە تانىتقان باتىر تۇلعا ەدى. وتاندىق اەروعارىش سالاسىن دامىتۋعا بار كۇش-جىگەرىن جۇمساپ، ەسەلى ەڭبەك ەتتى. سەنات دەپۋتاتى جانە قوعام قايراتكەرى رەتىندە كوپتەگەن يگى ىسكە باستاماشى بولدى. كاسىبي بىلىكتىلىگىمەن، اينالاسىنا سىيلى ازاماتتىق قالپىمەن حالىقتىڭ قۇرمەتىنە بولەنگەن تالعات امانگەلدىۇلىنىڭ جارقىن بەينەسى ۇمىتىلمايدى. يمانى سالامات، جانى ءجانناتتا بولسىن»،– دەپ جازىلعان جەدەلحاتتا.
تالعات مۇساباەۆ - قازاقتىڭ 2-ءشى، ال الەمنىڭ 309-شى عارىشقا ءۇش رەت ۇشقان عارىشكەرى. ول 1951 جىلى 7 قاڭتاردا الماتى وبلىسى، جامبىل اۋدانىنىڭ قارعالى اۋىلىندا ءتىلشى اكەسى مەن دارىگەر اناسىنىڭ وتباسىندا دۇنيەگە كەلگەن. ونىڭ عارىشتاعى العاشقى قىزمەتى 1994 جىلعى 1 شىلدەدە باستالىپ 4 قاراشاعا دەيىن سوزىلدى، ياعني ۇشۋ ۇزاقتىعى 125 تاۋلىك 22 ساعات 53 مينۋت 36 سەكۋندتى قۇرادى. اشىق عارىشقا بىرنەشە رەت شىقتى، ونىڭ جالپى ۇزاقتىعى 11 ساعات 7 مينۋتتى قۇرادى. وسى ساپاردا قازاقستان رەسپۋبليكاسىنىڭ عىلىمي ەكسپەريمەنتتەرىنىڭ ەكىنشى باعدارلاماسى تابىستى ورىندالدى، سونداي-اق رەسەي، اقش، گەرمانيا، فرانتسيا ەلدەرىنىڭ عىلىمي باعدارلامالارى جۇزەگە اسىرىلدى.
25-نەگىزگى ەكسپەديتسيا باعدارلاماسى بويىنشا 1998 جىلى قاڭتاردىڭ 29-ى مەن تامىزدىڭ 25-ءى ارالىعىندا «سويۋز-تم-27» جانە «مير» عارىش كەمەلەرىنىڭ كومانديرى رەتىندە عارىشتا بولعان. ۇشۋ كەزىندە 5 رەت اشىق عارىش كەڭىستىگىنە شىققان. 2001 جىلعى ءساۋىردىڭ 28-ءى مەن ماۋسىمنىڭ 6-ى ارالىعىندا «سويۋز-تم-32» عارىش كەمەسىمەن حالىقارالىق عارىشتىق ستانساسىنا بارعان ءبىرىنشى ەكسپەديتسيانىڭ ەكيپاج كومانديرى مىندەتىن اتقارعان. 2003-2005 جىلدارى - يۋ.ا.گاگارين اتىنداعى عارىشكەرلەر دايىنداۋ ورتالىعىنىڭ توپ كومانديرى، 2005-2007 جىلدارى - «بايتەرەك» قازاقستان-رەسەي بىرلەسكەن كاسىپورنى» اكتسيونەرلىك قوعامىنىڭ باس ديرەكتورى، 2007 جىلى 11 اقپاننان 11 ساۋىرگە دەيىن قازاقستاننىڭ اۋە-عارىش اگەنتتىگىنىڭ ديرەكتورى قىزمەتتەرىن اتقارعان. ودان بولەك، ۇلتتىق عارىش اگەنتتىگىنىڭ توراعاسى، تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ اەروعارىش كوميتەتىنىڭ توراعاسى بولعان. 2016–2017 جىلدارى — قازاقستان رەسپۋبليكاسى پرەزيدەنتىنىڭ كەڭەسشىسى، 2017–2023 جىلدارى — قازاقستان رەسپۋبليكاسى پارلامەنتى سەناتىنىڭ دەپۋتاتى، حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەسى قىزمەتتەرىن اتقارعان.
تالعات مۇساباەۆ قازاقستان رەسپۋبليكاسىنىڭ "حالىق قاھارمانى" جانە رەسەي فەدەراتسياسىنىڭ باتىرى، "وتان", "حالىقتار دوستىعى", 3-دارەجەلى "زا زاسلۋگي پەرەد وتەچەستۆوم" (رەسەي) وردەندەرىمەن، NASA-نىڭ "عارىشقا ۇشقانى ءۇشىن" مەدالىمەن ماراپاتتالعان.
