بيىل ەلىمىزدە ۇلى اقىن، اعارتۋشى اباي قۇنانبايۇلىنىڭ تۋعانىنا 180 جىل تولىپ وتىر. وسىعان وراي ۇلتتىق ستاتيستيكا بيۋروسى قايراتكەر ەسىمىمەن بايلانىستى قىزىقتى ستاتيستيكالىق دەرەكتەردى ۇسىندى، دەپ حابارلايدى «ادىرنا» ءتىلشىسى.
رەسمي دەرەكتەرگە سۇيەنسەك، قازاقستاندا اباي ەسىمدى 18 763 ادام تۇرادى. بۇل ەسىم يەلەرىنىڭ باسىم بولىگى استانا قالاسى (2 089 ادام), تۇركىستان وبلىسى (2 018) جانە الماتى قالاسىندا (1 719) تۇرادى.
اباي ەسىمدى ەڭ ەگدە جاستاعى تۇرعىن 1932 جىلى دۇنيەگە كەلگەن. بۇل ەسىم ەڭ كوپ تارالعان جاس توبى – 30-34 جاس ارالىعىنداعىلار، ولاردىڭ سانى – 3 228 ادام. بيىلعى ءبىرىنشى جارتى جىلدا تۋعان 157 نارەستەگە اباي ەسىمى بەرىلگەن.
بۇل ەسىم قىز بالالارعا دا قويىلعان، قازاقستاندا اباي ەسىمدى 10 ايەل تىركەلگەن. يبراھيم (يبراگيم، يبراحيم) ەسىمدى ازاماتتاردىڭ سانى ەلىمىزدە 35 404 ادام.
اقىننىڭ قۇرمەتىنە ەلىمىزدە 1 وبلىس، 1 قالا، 3 اۋدان جانە 26 اۋىلعا ۇلى تۇلعا ەسىمى بەرىلگەن.
