بۇگىن - قازاقتىڭ ءبىرتۋار اقىنى اباي قۇنانبايۇلىنىڭ تۋعان كۇنى.
بيىل قازاقتىڭ ۇلى اقىنى، ويشىلى اباي قۇنانبايۇلىنىڭ تۋعانىنا 180 جىل تولىپ وتىر. ول 1845 جىلى قازىرگى اباي وبلىسىنىڭ قاراۋىل اۋىلىندا دۇنيەگە كەلىپ، قازاق ادەبي ءتىلىنىڭ نەگىزىن قالاۋشى تۇلعا.
مەرەيتويعا وراي ەلىمىزدە اباي ونكۇندىگى ءوتىپ جاتىر. اباي وبلىسىندا جيدەباي-ءبورىلى مۋزەيىندە «اباي بەينەلەۋ ونەرىندە» كورمەسى اشىلدى. قاراۋىلتوبەدە رەسپۋبليكالىق «جەتى قازىنا» فەستيۆالى، اباي وقۋلارى، اقىندار ايتىسى، حالىقارالىق عىلىمي كونفەرەنتسيالار ۇيىمداستىرىلدى. مەرەكە اياسىندا قازاقستان بويىنشا 100-دەن استام مادەني جانە عىلىمي ءىس-شارا وتكىزۋ جوسپارلانعان.
مەرەكەنىڭ شارىقتاۋ شەگى اقىننىڭ تۋعان جەرى – اباي وبلىسىندا وتۋدە.
بۇگىن تاڭەرتەڭ جيدەبايداعى قورىق-مەكەندە قۇران باعىشتالىپ، قۇرباندىق شالىنادى. ەلىمىزدىڭ بارلىق وڭىرلەرىندە اباي ەسكەرتكىشتەرىنە گۇل شوقتارى قويىلادى. قاراۋىلدا «بالا ابايدان دانا ابايعا» اتتى تەاترلاندىرىلعان قويىلىممەن باستالعان مەرەكەلىك باعدارلاما كونتسەرتتەرمەن، ۇلتتىق اس بەرۋ راسىمىمەن، ات جارىس پەن قازاق كۇرەسىنەن رەسپۋبليكالىق تۋرنيرلەرمەن جالعاسادى.
كەشكىسىن قاراۋىلدا «جەلسىز تۇندە جارىق اي» اتتى گالا-كونتسەرت وتەدى. سەمەيدە پاراللەل تۇردە «ۇلىتاۋ» توبى مەن ەسترادا جۇلدىزدارىنىڭ قاتىسۋىمەن اباي اندەرىنە ارنالعان ۇلكەن كونتسەرت ۇيىمداستىرىلماق. بۇل شارالار ونكۇندىك مەرەكەنىڭ قورىتىندىسى بولماق.
ەسكە سالا كەتەيىك، 2020 جىلدىڭ 5 تامىزىندا قازاقستان رەسپۋبليكاسى ۇكىمەتىنىڭ قاۋلىسىمەن 10 تامىز اباي كۇنى بولىپ بەلگىلەندى. بۇل مەرەكە اباي قۇنانبايۇلىنىڭ 175 جىلدىق مەرەيتويىنىڭ قارساڭىندا بەكىتىلگەن ەدى.
مەرەكە رەسمي دەمالىس كۇنى بولىپ سانالمايدى.
