قورعانىس مينيسترلىگى سوربۇلاقتا جۇرگىزىلگەن ىزدەستىرۋ وپەراتسياسى بارىسىندا ەكىنشى ءمايىتتى تاپتى، دەپ حابارلايدى "ادىرنا" ۇلتتىق پورتالى.
«EC-145 تىكۇشاعىنىڭ قۇلاعان جەرىندە جۇرگىزىلىپ جاتقان ىزدەستىرۋ-قۇتقارۋ جۇمىستارى بارىسىندا ەكىنشى ءمايىت تابىلىپ، سۋ بەتىنە كوتەرىلدى. قازىرگى ۋاقىتتا قۇزىرلى ورگانداردىڭ قاتىسۋىمەن جەكە باسىن انىقتاۋ پروتسەدۋراسى جۇرگىزىلۋدە»، – دەلىنگەن قورعانىس مينيسترلىگىنىڭ حابارلاماسىندا.
اقپاراتتا ىزدەستىرۋ جۇمىستارى قورعانىس مينيسترلىگى، تجم، ءىىم جانە باسقا دا ۆەدومستۆولاردىڭ بارلىق قاجەتتى كۇشتەرى مەن قۇرالدارىن تارتا وتىرىپ، تاۋلىك بويى جۇرگىزىلىپ جاتقانى ەسكە سالىندى.
بۇعان دەيىن سوربۇلاق كولىندە شامامەن 14 مەتر تەرەڭدىكتەن جوعالعان تىكۇشاقتىڭ بولشەكتەرى مەن ءمايىتتىڭ تابىلعانى، جەكە باسىن انىقتاۋ پروتسەدۋراسى جۇرگىزىلىپ جاتقانى حابارلانعان ەدى.
ۆەدومستۆو مالىمەتىنشە، ىزدەۋ جۇمىستارىنا سۋ استىنداعى ناشار كورىنۋ مەن لايلى شوگىندىلەر كەدەرگى كەلتىرۋدە. بۇل سۇڭگۋىرلەر مەن ينجەنەرلىك بولىمشەلەردىڭ جۇمىسىن باياۋلاتادى.
ەسكە سالساق، الماتى وبلىسىندا EC-145 اسكەري تىكۇشاعى راداردان جوعالىپ كەتكەن ەدى. 26 شىلدەدە اۋە كەمەسىنىڭ سىنىقتارى سوربۇلاق كولىنىڭ اكۆاتورياسىنان تابىلعان، الايدا ەكيپاجدى ىزدەۋ ءالى دە جالعاسىپ جاتىر.
