اتىراۋدا شەتەلدەگى سوعىس قيمىلدارىنا قاتىسقان ەر ادامعا ۇكىم شىقتى، دەپ حابارلايدى "ادىرنا" ۇلتتىق پورتالى Kazinform-عا سىلتەمە جاساپ.
اتىراۋ قالاسىنىڭ №2 سوتى جەرگىلىكتى تۇرعىندى قىلمىستىق كودەكستىڭ 172-بابى ("شەت مەملەكەتتىڭ اۋماعىنداعى قارۋلى قاقتىعىستارعا قاتىسۋ") بويىنشا 5 جىلعا باس بوستاندىعىنان ايىردى.
تەرگەۋ دەرەكتەرىنە سايكەس، رەسەيدە ەڭبەك ەتىپ جۇرگەن كەزىندە ەر ادام كەلىسىمشارتقا وتىرىپ، رف قارۋلى كۇشتەرى قۇرامىندا ۋكراينا اۋماعىنداعى سوعىس قيمىلدارىنا قاتىسقان. ءبىر اتىس كەزىندە ول وق-ءدارى جارقىنشاعىنان جارالانعان.
قۇقىق قورعاۋ ورگاندارى شەت ەلدەگى قارۋلى قاقتىعىستارعا قاتىسۋ ءۇشىن 9 جىلعا دەيىن باس بوستاندىعىنان ايىرۋ جازاسى قاراستىرىلعانىن، ال جالدامالىلىق ءۇشىن 20 جىلعا دەيىن جازا تاعايىندالاتىنىن ەسكە سالدى.
سونداي-اق، قازاقستاندىقتاردى سوعىسقا قاتىسۋعا ۇگىتتەۋ فاكتىلەرى بويىنشا ءىىم مەن ۇقك تەكسەرۋ جۇرگىزىپ جاتقانى ايتىلدى.
بۇعان دەيىن 2022 جىلدان بەرى شەتەلدەگى سوعىس قيمىلدارىنا قاتىسقانى ءۇشىن قازاقستاندا 97 قىلمىستىق ءىس قوزعالعانى حابارلانعان ەدى.
