قازاقستان پرەزيدەنتى قاسىم-جومارت توقاەۆ ەلىمىزدەگى العاشقى اتوم ەلەكتر ستانتسياسىنا ەڭ ۇزدىك اتاۋ بەرۋ ءۇشىن بايقاۋ وتكىزۋدى ۇسىندى، دەپ حابارلايدى "ادىرنا" ۇلتتىق پورتالى.
بۇل تۋرالى مەملەكەت باسشىسى حالىقارالىق پاندىك وليمپيادالاردىڭ جەڭىمپازدارىمەن كەزدەسۋ بارىسىندا ايتتى. پرەزيدەنتتىڭ ايتۋىنشا، جاستاردىڭ بەدەلدى حالىقارالىق وليمپيادالارداعى جەتىستىكتەرى حالقىمىزدىڭ زياتكەرلىك الەۋەتى مەن ءوسىپ كەلە جاتقان ۇرپاقتىڭ جوعارى مۇمكىندىكتەرىن كورسەتەدى.
«ەلىمىزگە عالىمدار، ينجەنەرلەر، پەداگوگتەر، دارىگەرلەر جانە باسقا دا جوعارى بىلىكتى ماماندار قاجەت. اسىرەسە جاساندى ينتەللەكت سالاسىنداعى ماماندار سۇرانىسقا يە بولادى»، – دەدى ول.
پرەزيدەنتتىڭ ايتۋىنشا، يننوۆاتسيالار مەن جوعارى تەحنولوگيالار نەگىزىندە ءبىز ەلىمىزدىڭ كەلەشەكتەگى ونداعان جىلدارعا ارنالعان بەرىك دامۋ ىرگەتاسىن قالاۋدامىز. سونداي-اق قاسىم-جومارت توقاەۆ ءۇشىن ستراتەگيالىق ماڭىزى بار العاشقى اتوم ەلەكتر ستانتسياسىن «روساتوم» كومپانياسىمەن بىرلەسىپ سالۋ ىسىنە رەسمي تۇردە كىرىسكەنىمىزدى اتاپ ءوتتى.
«اەس – بۇل جاي عانا ەنەرگەتيكا نىسانى ەمەس، ول – عىلىمي-تەحنيكالىق پروگرەستىڭ جارقىن سيمۆولى. ازىرگە بۇل نىساننىڭ اتاۋى جوق. ويتكەنى ول ەلىمىزدەگى العاشقى نىسان بولعاندىقتان، وعان اتاۋ بەرۋ ءۇشىن جالپىۇلتتىق بايقاۋ جاريالاۋعا بولادى دەپ ەسەپتەيمىن. سىزدەردى دە وسى بايقاۋعا قاتىسىپ، كرەاتيۆتىلىك تانىتۋعا شاقىرامىن. مۇمكىن، سىزدەردىڭ ۇسىنىستارىڭىزدىڭ ءبىرى ءبىز شەشىم قابىلدايتىن كەزدە كادەگە جارار»، – دەدى مەملەكەت باسشىسى.
