الماتى قالاسىندا وتكەن تامىز ايىنداعى ۇلتتىق بىرىڭعاي تەستىلەۋدە 85 جاستاعى نۇريحان اپا ۋنيۆەرسيتەتكە ءتۇسۋ ءۇشىن سىناققا قاتىسىپ، كوپتەن بەرگى ارمانىن ورىنداۋعا قادام جاسادى، دەپ حابارلايدى "ادىرنا" ۇلتتىق پورتالى.
ۇلتتىق تەستىلەۋ ورتالىعىنىڭ مالىمەتىنشە، نۇريحان اپا جاستىق شاعىندا جوعارى وقۋ ورنىنا تۇسە الماعان. ءومىرىنىڭ كوپ بولىگىن بالا تاربيەسىنە ارناعان ول ءبىلىم الۋعا دەگەن ىقىلاسىن ەشقاشان جوعالتپاعان. بيىل تۋعان-تۋىستارىنىڭ جانە بالالارىنىڭ قولداۋىمەن ۇبت-عا تىركەلىپ، كوپتەن كۇتكەن سىناق زالىنا كىردى.
تەستىلەۋ كۇنى نۇريحان اپانىڭ جانىندا بالالارى دەمەۋ بولىپ، رۋحاني قولداۋ كورسەتتى. ەمتيحان باستالار الدىندا ول باسقا تالاپكەرلەرگە اق باتاسىن بەرىپ، «وقۋ مەن بىلىمگە ۇمتىلۋ – ەشقاشان كەش ەمەس» دەگەن جۇرەكجاردى تىلەگىن ايتتى.
الايدا بۇل العاشقى تالپىنىستا كومپيۋتەرمەن جۇمىس ىستەۋ ماشىعىنىڭ جوقتىعى قيىندىق تۋعىزدى. تەستىلەۋ ورتالىعىنىڭ حابارلاۋىنشا، زاماناۋي فورماتتا ەمتيحان تاپسىرۋ نۇريحان اپا ءۇشىن جاڭا تاجىريبە بولعاندىقتان، سۇراقتاردى تولىق ورىنداۋعا ۇلگەرمەگەن.
دەگەنمەن، ول بۇل جاعدايدى ساتسىزدىك دەپ سانامايدى. كەرىسىنشە، اقپاراتتىق تەحنولوگيالاردى ۇيرەنىپ، كەلەسى جىلى ۇبت-عا قايتا قاتىسۋعا نيەتتى ەكەنىن جەتكىزدى.
"مەنىڭ ماقساتىم – ءبىلىم الۋ، ءوزىمدى دامىتۋ. جاسقا قاراماي، ءومىر بويى وقۋعا بولادى. كەلەسى جىلى دايىندالىپ كەلەمىن", — دەدى نۇريحان اپا.
