رەسەيدىڭ ريازان وبلىسىندا كاسىپورىندا جارىلىس بولىپ، ايماقتا ازا تۇتۋ كۇنى جاريالاندى «ادىرنا» ءتىلشىسى.
وقىس وقيعا 15 تامىز كۇنى ريازان وبلىسىنىڭ شيلوۆ اۋدانىداعى «ەلاستيك» زاۋىتىنداعى وق-ءدارى تسەحىندا بولعان. سوڭعى دەرەكتەرگە سۇيەنسەك، قازا تاپقاندار سانى 11 ادامعا جەتكەن.
«قايعىلى جاعدايعا بايلانىستى 18 تامىز ازا تۇتۋ كۇنى دەپ جاريالاندى»،—دەدى وبلىس گۋبەرناتورى پاۆەل مالكوۆ.
ول بۇكىل ايماق بويىنشا مەملەكەتتىك تۋ تومەن تۇسىرىلەتىنىن، ال مادەنيەت مەكەمەلەرى، تەلەراديو كومپانيالارى مەن ۇيىمدارعا كوڭىل كوتەرۋ شارالارىن وتكىزبەۋ ۇسىنىلعانىن اتاپ ءوتتى.
وقيعا سالدارىنان 130 ادام زارداپ شەككەن، ولاردىڭ 29-ى اۋرۋحاناعا جاتقىزىلعان. بارلىق زارداپ شەككەن جانعا قاجەتتى مەديتسينالىق كومەك كورسەتىلگەن.
سونىمەن قاتار قازىرگى ۋاقىتتا سالداردى جويۋ جۇمىستارى جۇرگىزىلۋدە. تەرگەۋ كوميتەتى ونەركاسىپتىك قاۋىپسىزدىك تالاپتارىنىڭ بۇزىلۋى بويىنشا قىلمىستىق ءىس قوزعادى.
