جوبا - مەملەكەت باسشىسىنىڭ ۇلىتاۋ وبلىسىن دامىتۋعا قاتىستى تاپسىرماسىنا سايكەس بولات وتەمۇراتوۆ قورىنىڭ قولداۋىمەن جەزقازعان قالاسىندا باستاۋ الدى. عيماراتتىڭ جالپى اۋماعى 2600 شارشى مەتر بولادى، نىسان - 250 بالاعا شاقتالعان. وقۋشىلار سارايىنىڭ العاشقى ىرگەتاسىن قالاۋ راسىمىنە قاتىسقان ۇلىتاۋ وبلىسىنىڭ اكىمى داستان رىسپەكوۆ قور باسشىلىعىنا العىسىن جەتكىزدى.
«وزدەرىڭىز بىلەتىندەي، جەزقازعان قالاسىنىڭ باتىس اۋدانى دامۋ ساتىسىندا. بۇل اۋماقتا الداعى ۋاقىتتا وبلىس ورتالىعىنىڭ ارحيتەكتۋرالىق كەلبەتىن جاقسارتاتىن الەۋمەتتىك نىساندار، كوپقاباتتى تۇرعىن ۇيلەر بوي كوتەرىپ، قالا حالقى ءۇشىن قولايلى ورتا قالىپتاسادى. سولاردىڭ ءبىرى –وسى وقۋشىلار سارايى بولماق. جاس وبلىسىمىزدا تاريحي ءساتتىڭ ورىن الۋىنا قولداۋ بىلدىرگەن بولات وتەمۇراتوۆ اتىنداعى قوردىڭ باسشىلىعىنا العىسىمىز شەكسىز»-دەدى ۇلىتاۋ وبلىسىنىڭ اكىمى داستان رىسپەكوۆ.
سالتاناتتى راسىمگە بولات وتەمۇراتوۆ قورىنىڭ ديرەكتورى اينۇر كاربوزوۆا مەن قوردىڭ قامقورشىلىق كەڭەسىنىڭ توراعاسى الماز شارمان ارنايى قاتىستى.
جاڭا وقۋشىلار سارايىنىڭ ىشىندە اكت زالى، مەدياورتالىق، حورەوگرافيا جانە جەكپە-جەك زالدارى، سەنسورلىق بولمەلەر، فوتوستۋديا مەن مۋزىكالىق كابينەتتەر، سونداي-اق تسيفرلىق ونەر، روبوتوتەحنيكا، جاراتىلىستانۋ جانە ناقتى عىلىمداردى بىرىكتىرەتىن مامانداندىرىلعان STEM-ورتالىعى ورنالاسادى.
كورشىلەس اۋماقتا بالالار جانە سپورت الاڭدارى، دەمالىس ايماقتارى، اۆتوتۇراق پەن كوگالداندىرۋ قاراستىرىلادى. عيمارات تولىقتاي مۇمكىندىگى شەكتەۋلى ازاماتتارعا بەيىمدەلىپ، قاۋىپسىزدىك پەن ەنەرگيا تيىمدىلىگى تالاپتارىنا ساي بولادى. قۇرىلىستىڭ 2026 جىلدىڭ ماۋسىمىندا اياقتالۋى كۇتىلۋدە.
