فوتو: ماقسات شاعىرباي / Kazinform
Kazinform اقپارات اگەنتتىگىنىڭ فوتوگرافى ماقسات شاعىرباي ە حالىقارالىق PhotOlympic-2025 فوتوبايقاۋىندا توپ جارىپ، ەكى التىن، ءبىر كۇمىس جانە ءبىر قولا مەدال جەڭىپ الدى، سونداي-اق الەمنىڭ تۇكپىر-تۇكپىرىنەن كەلگەن 96 قاتىسۋشىنىڭ اراسىنان ارنايى سىيلىققا يە بولدى، دەپ حابارلايدى “ادىرنا” Kazinform اگەنتتىگىنە سىلتەپ.
ايتا كەتەيىك، بۇل بايقاۋ ەكىنشى رەت وتكىزىلىپ وتىر.
العاشقى PhotOlympic بايقاۋى سەربيانىڭ نوۆي-ساد قالاسىندا ءوتتى، ال بيىل بايقاۋدى رەسەيدىڭ مادەني استاناسى — سانكت-پەتەربۋرگ قالاسى قابىلدادى. مۇندا الەمنىڭ ءار تۇكپىرىنەن ەڭ ۇزدىك فوتوگرافتار جينالدى.
فوتوبايقاۋعا 96 تالانتتى فوتوگراف قاتىستى، ال ونىڭ باستى ەرەكشەلىگى — باسقا بايقاۋلاردان مۇلدە وزگەشە ەرەكشە ءارى بىرەگەي شارتتار بولدى.
ءار قاتىسۋشىعا 24 ساعات ىشىندە 24 ءتۇرلى تاقىرىپقا ارنالعان تاپسىرمانى ورىنداۋ ۇسىنىلدى.
ءار تاقىرىپقا ساي ءبىر فوتوسۋرەت ءتۇسىرىپ، ونى قاتاڭ بەلگىلەنگەن ۋاقىتتا قازىلار القاسىنا وتكىزۋ كەرەك بولدى.
قازىلار القاسى جۇمىستاردى بالدىق جۇيەمەن باعالاپ، ءار نوميناتسيا بويىنشا جەڭىمپازداردى انىقتاپ، ماراپاتتار تابىستادى.
