تۇركيا بيلىگى سوعىس، اپاتتار جانە وزگە دە توتەنشە جاعدايلار، سونىڭ ىشىندە «يادرولىق وقيعالار» كەزىندە حالىقتى قورعاۋ ءۇشىن ارنايى پانالاۋ ورىندارىن سالۋ جوباسىن باستادى. بۇل تۋرالى تاسس اگەنتتىگىنە سىلتەمە جاساپ تۇرىكتىڭ NTV تەلەارناسى جاريالادى، دەپ حابارلايدى “ادىرنا”.
جوبا الدىمەن انكارا مەن باسقا ءىرى قالالاردا باستالىپ، كەيىن بۇكىل ەل اۋماعىنا تارالادى.
اتالعان باق-تىڭ مالىمەتىنشە، ازاماتتىق قورعانىس شارالارىن كۇشەيتۋ ماسەلەسى تۇركيا پرەزيدەنتى رەجەپ تايپ ەردوعان توراعالىعىمەن وتكەن ۇكىمەت وتىرىستارىندا قاراستىرىلعان. شەنەۋنىكتەر قازىرگى قولدانىستاعى پانالاۋ ورىندارىنىڭ باسىم بولىگى كوپقاباتتى تۇرعىن ۇيلەردىڭ جەرتولەلەرىندە جانە جەر استى اۆتوتۇراقتارىندا ورنالاسقانىن جانە قازىرگى توتەنشە جاعدايلار تالاپتارىنا ساي كەلمەيتىنىن مويىندادى.
وسىعان بايلانىستى بيلىك ءار ايماقتىڭ ەرەكشەلىگىن ەسكەرە وتىرىپ، قورعانىس نىساندارىنىڭ ينفراقۇرىلىمىن جاڭارتۋعا شەشىم قابىلدادى. مۇنداي قادامعا بارۋدىڭ وزەكتىلىگى تۇركياعا جاقىن ايماقتاردا اسكەري قاقتىعىستار مەن اپاتتار تۋىنداۋ قاۋپىنىڭ بار بولۋىمەن ءتۇسىندىرىلدى. جاڭا پانالاۋ ورىندارى رادياتسيالىق لاستانۋ جاعدايىندا دا حالىقتى قورعاۋعا قابىلەتتى بولۋى ءتيىس.
تۇرىك تەلەارناسىنىڭ حابارلاۋىنشا، جوبا ازىرلەنۋ بارىسىندا جاپونيا، شۆەيتساريا جانە ءيزرايلدىڭ تاجىريبەسى زەرتتەلگەن. ناتيجەسىندە ەلدىڭ بارلىق ايماقتارىندا ءتۇرلى قاۋىپ-قاتەرلەرگە توتەپ بەرە الاتىن قورعانىس قۇرىلىمدارى سالىنادى. سونىمەن قاتار، بۇل نىساندار حالىقتىڭ باسىم بولىگى جىلدام جەتىپ بارا الاتىنداي ەتىپ ورنالاستىرىلادى.
