قازاقستان رەسپۋبليكاسىنىڭ كونستيتۋتسيانىڭ 30-جىلدىعى قارساڭىندا كوكشەتاۋدا ەسكى ۇيلەردەن قونىس اۋدارعان تۇرعىندارعا جاڭا پاتەرلەردىڭ كىلتىن تابىستاۋ ءراسىمى ءوتتى.
كوپتەن كۇتكەن جايلى باسپانانى شامامەن 100 كوكشەتاۋلىق وتباسى «جاڭا شاڭىراق» تۇرعىن ءۇي كەشەنىمەن ۆەرنادسكي كوشەسىندەگى جاڭا تۇرعىن ءۇي كەشەنىنەن الدى، جانە دە رەنوۆاتسيا باعدارلاماسىنا قاتىسۋشىلار ءۇشىن مەملەكەت ارنايى پاتەرلەر ساتىپ العان.
اقمولا وبلىسىنىڭ اكىمى مارات احمەتجانوۆ سالتاناتتى شارادا ءوڭىر تۇرعىندارىن بۇگىنگى قۋانىشتى وقيعامەن قۇتتىقتادى.
«بۇل – ۇلكەن بىرلەسكەن جۇمىستىڭ ناتيجەسى. ءبىزدىڭ وبلىس ەلىمىزدە العاشقىلاردىڭ ءبىرى بولىپ رەنوۆاتسيا باعدارلاماسىن جۇزەگە اسىرا باستادى. جوبا ادامنىڭ باستى قاجەتتىلىكتەرىنىڭ ءبىرى – قولايلى ينفراقۇرىلىمعا دەگەن سۇرانىسىن قامتاماسىز ەتەدى. ەسكى تۇرعىن ۇيلەر تاريح قويناۋىنا كەتىپ، ولاردىڭ ورنىندا جاڭا ءارى زاماناۋي شاعىناۋداندار بوي كوتەرۋدە. بۇگىن كوكشەتاۋدا شامامەن ءجۇز وتباسى كوپتەن كۇتكەن باسپاناسىنا قول جەتكىزۋدە. بۇل – ءاربىر وتباسى ءۇشىن جاڭا ءومىردىڭ باستاۋى»، – دەدى ءوڭىر باسشىسى.
ايتا كەتۋ كەرەك، رەنوۆاتسيا جوبالارى بيۋدجەت قارجىسىنسىز جۇزەگە اسىرىلۋدا. بۇل – مەملەكەت پەن بيزنەستىڭ ءتيىمدى ارىپتەستىگىنىڭ ناتيجەسى. وبلىس اكىمىدىگى، سپك «KOKSHE» جانە قۇرىلىس كومپانيالارى بىرلەسىپ قابىلداعان شەشىمدى بۇگىندە قازاقستاننىڭ وزگە وڭىرلەرى دە زەردەلەۋدە.
سونىمەن قاتار، الەۋمەتتىك وسال توپتاردى ساپالى تۇرعىن ۇيمەن قامتاماسىز ەتۋ، ونىڭ ىشىندە رەنوۆاتسيا باعدارلاماسى بويىنشا جۇرگىزىلىپ جاتقان جۇمىستار ەل پرەزيدەنتى قاسىم-جومارت توقاەۆ تاراپىنان وڭ باعاسىن الدى.
قازىرگى تاڭدا باعدارلاما تەك وبلىس ورتالىعىندا عانا ەمەس، سونداي-اق ششۋچينسك، ماكينسك قالالارىندا، ارشالى مەن زەرەندى كەنتتەرىندە دە تابىستى ىسكە اسىرىلۋدا.
«مۇنداي ءتاسىل – سەنىم، ىنتىماقتاستىق پەن ورتاق جاۋاپكەرشىلىك بولعان جاعدايدا ۇلكەن ماقساتتارعا قول جەتكىزۋگە بولاتىنىن كورسەتەتىن ۇلگى»، – دەدى وبلىس اكىمى ءوز سوزىندە.
جاڭا پاتەرگە قول جەتكىزگەن قالا تۇرعىنى ەۆدوكيا دەلفمان قۋانىشىمەن ءبولىسىپ:
«بيىل كوكتەمدە بىزگە جاڭا ۇيگە كوشەتىنىمىزدى ايتقاندا بىردەن كەلىستىك. مىنە، ارادا جارتى جىل وتپەي، جارىق تا جايلى پاتەرگە قونىس اۋدارىپ وتىرمىز. مەملەكەتكە جانە وسى ىسكە اتسالىسقانداردىڭ بارىنە العىسىمىز شەكسىز. بۇگىن ءبىزدىڭ ارمانىمىز ورىندالدى!» – دەدى.
«جاڭا شاڭىراق» تۇرعىن ءۇي كەشەنى ۋاليحانوۆ–بىكوۆسكي–ساين–تىلەنديەۆ كوشەلەرىنىڭ شارشى اۋماعىندا سالىندى. مۇندا 2024 جىلدىڭ قاراشا ايىندا التى ەسكى ءۇي سۇرىلگەن بولاتىن. ال ۆەرنادسكي كوشەسىندەگى جاڭا ءۇي 2024 جىلدىڭ ساۋىرىندە سۇرىلگەن ەسكى ۇيلەردىڭ ورنىنا تۇرعىزىلدى. ينۆەستورلار رەتىندە جەرگىلىكتى قۇرىلىس كومپانيالارى قاتىسىپ وتىر. ۇيلەر زاماناۋي ستاندارتتارعا ساي سالىنعان: بارلىق ينجەنەرلىك كوممۋنيكاتسيالار جۇرگىزىلگەن، اۋلا اباتتاندىرىلعان، بالالار الاڭدارى مەن فۋتبول الاڭى بار. سونداي-اق باراك ۇلگىسىندەگى ەسكى ۇيلەردىڭ ورنىنا تۇرعىندار سەرۋەندەپ، دەمالاتىن سكۆەر پايدا بولادى.
باعدارلاماعا قاتىسۋشىلار ءۇشىن بۇل تەك قونىس اۋدارۋ عانا ەمەس – ومىرلەرىندەگى جاڭا كەزەڭنىڭ باستالۋى. جىلدار بويى ەسكى ءارى اپاتتى ۇيلەردە تۇرعان كوپتەگەن وتباسى العاش رەت زاماناۋي تالاپتارعا ساي جايلى ءارى قاۋىپسىز تۇرعىن ۇيگە قول جەتكىزدى.
