اقش-تاعى يۋتا شتاتىنىڭ Utah Valley ۋنيۆەرسيتەتى كامپۋسىندا ساياسي بەلسەندى ءارى ترامپتىڭ جاقتاسى چارلي كيركتى كوپتىڭ الدىندا ءسوز سويلەپ تۇرعان ساتتە اتىپ كەتتى، دەپ حابارلايدى «ادىرنا» ءتىلشىسى.
وق ونىڭ موينىنا تيگەن. بەلسەندى بىردەن اۋرۋحاناعا جەتكىزىلگەن. الايدا كەيىننەن اقش پرەزيدەنتى دونالد ترامپ چارلي كيركتىڭ قازا تاپقانىن مالىمدەدى. ول Truth Social جەلىسىندە بۇكىل ەل بويىنشا ءتورت كۇنگە ءارتۇرلى مەملەكەتتىك عيماراتتار مەن باسقا دا ورىنداردا تۋلاردىڭ تومەن ءتۇسىرىلۋىن بۇيىرعانىن اتاپ ءوتتى.
«ۇلى ءارى ءتىپتى اڭىزعا اينالعان چارلي كيرك قايتىس بولدى. امەريكا قۇراما شتاتتارىنداعى جاستاردى چارليدان جاقسى تۇسىنەتىن جانە ولاردىڭ كۇيىنە جانى اشيتىن ادام بولعان جوق. بارلىعى ونى جاقسى كوردى جانە تاڭداندى، ولاردىڭ ءبىرى – مەن. ەندى ول بىزبەن بىرگە ەمەس. مەلانيامەن بىرگە جۇبايى ەريكاعا جانە وتباسىنىڭ بارلىعىنا كوڭىل ايتىپ جاتىرمىز. چارلي، ءبىز سەنى جاقسى كورەمىز!» - دەپ جازدى ترامپ.
The Washington Post باسىلىمىنىڭ مالىمەتىنشە، قايعىلى جاعدايدان كەيىن اقش استاناسى كۇشەيتىلگەن كۇزەتكە الىنعان. ءتىپتى اق ۇيگە جاقىن كوشەلەردە ءىشىنارا قوزعالىس شەكتەلگەنى ايتىلدى.
ايتا كەتەيىك، 31 جاستاعى چارلي كيرك — Turning Point USA ۇيىمىنىڭ نەگىزىن قالاۋشى، كونسەرۆاتيۆتى قۇندىلىقتاردى مەكتەپتەر مەن ۋنيۆەرسيتەتتەردە ناسيحاتتايتىن تانىمال بەلسەندى، پودكاستەر. رەسمي دەرەكتەرگە قاراعاندا، وق ءبىلىم بەرۋ كامپۋسىنىڭ عيماراتتارىنان شامامەن 200 مەتر قاشىقتىقتان اتىلعان. باستاپقىدا كۇدىكتى تۇتقىندالدى دەگەن حابار تارادى، كەيىن ول ادامنىڭ اتىشۋلى وقيعاعا قاتىسى جوق ەكەنى انىقتالدى. قازىرگى تاڭدا كۇدىكتى ءالى انىقتالعان جوق.
