ەلىمىزدە ستوماتولوگيالىق قىزمەتتەرگە زەينەتاقى جيناقتارىن پايدالانۋ ءۇشىن ءوتىنىش قابىلداۋ ۋاقىتشا توقتاتىلادى. بۇل تۋرالى «وتباسى بانك» ايتتى، دەپ حابارلايدى «ادىرنا» ءتىلشىسى.
«2025 جىلعى 15 قىركۇيەكتەن باستاپ enpf-otbasy.kz پلاتفورماسىندا ءتىس ەمدەۋگە زەينەتاقى جيناقتارىن (بجزق قاراجاتىن) پايدالانۋ بويىنشا وتىنىمدەر قابىلداۋ توقتاتىلادى. اتالعان كۇنگە دەيىن بەرىلگەن بارلىق وتىنىمدەر قالىپتى تارتىپتە قارالادى جانە وڭدەلەدى»،– دەلىنگەن حابارلامادا.
وتىنىشتەردى قايتا قابىلداۋ مەرزىمى تۋرالى بانك بەلگىلى ءبىر ۋاقىت ارالىعىندا قوسىمشا حابارلايتىن بولادى. بىراق ونىڭ ۋاقىتى كورسەتىلمەگەن.
ەسكە سالايىق، بۇعان دەيىن قارجى مونيتورينگى اگەنتتىگى زەينەتاقى قورىنىڭ 200 ملرد تەڭگەسى جالعان ستوماتولوگيالىق قىزمەت كورسەتۋ ارقىلى نەگىزسىز الىنعانىن مالىمدەگەن ەدى.
