استاناداعى بەكزات ساتتارحانوۆ اتىنداعى سپورت كەشەنىندە قازاقتىڭ اردا ۇلىنا ارنالعان ايرىقشا كەش ءوتتى. جازۋشى بەيبىت سارىبايدىڭ “بەكزات. شارشى الاڭنان تىس ءومىرى” اتتى كىتابى وقىرمانعا جول تارتتى. بۇل تۋىندى – چەمپيوننىڭ تەك شارشى الاڭداعى جەڭىستەرىن ەمەس، ونىڭ جان دۇنيەسىن، اقىندىق بولمىسىن، ادامدىق اسىل قاسيەتتەرىن اشۋعا تالپىنعان ادەبي ەسكەرتكىش.
كەشتىڭ شىمىلدىعىن العاشقىلاردىڭ ءبىرى بولىپ “بەلەس” قۇرىلىس كومپانياسىنىڭ باسشىسى ماحات ءتورالى ءتۇردى. ول سوزىندە بەكزاتقا دەگەن ىستىق ىقىلاسىن جاسىرمادى:
“مەن بەكزاتتى بالا كەزىمنەن ۇلگى تۇتتىم. ونىڭ ءاربىر جەكپە-جەگىن كورگەن سايىن جۇرەگىمىز دۇرسىلدەپ، نامىسىمىز وياناتىن. بەكزات بىزگە جەڭىستىڭ دە، ادامدىقتىڭ دا قانداي بولاتىنىن كورسەتتى. ۋاقىت وتكەن سايىن ونىڭ بەينەسى اڭىزعا اينالىپ بارادى، بىراق ءبىز ءۇشىن ول ارقاشان ءتىرى. بەكزات – ءبىزدىڭ ماقتانىشىمىز، رۋحىمىزدىڭ سيمۆولى”، – دەدى ول تەبىرەنە.
شارا بارىسىندا سونداي-اق سەناتور نۇرتىلەۋ ءجۇسىپ، استانا قالاسى جازۋشىلار وداعىنىڭ مۇشەسى باۋىرجان باباجانۇلى، ءماجىلىس دەپۋتاتى جانداربەك ءاشىمجان، جازۋشى قانات ابىلقايىر ءسوز سويلەپ، بەكزاتتىڭ قازاق جاستارى ءۇشىن ماڭگىلىك ۇلگى ەكەنىن اتاپ ءوتتى.
كىتاپ اۆتورى بەيبىت سارىباي جۇرەكجاردى سىرىن بىلاي جەتكىزدى:
“بەكزات – ناعىز اقىن ەدى، بىراق ونى كوپشىلىك بىلە بەرمەيدى. مەن وسى ەڭبەكتە قازاق جىگىتىنىڭ كوركەم بەينەسىن عانا ەمەس، وعان عاشىق بولعان قازاق قىزدارىنىڭ جيىنتىق وبرازىن جاساعىم كەلدى. كەيىپكەرگە جىبەك ەسىمىن بەردىم. ويتكەنى جىبەك – قازاق قىزىنىڭ ۇياڭدىعى مەن نازىكتىگىنىڭ سيمۆولى. بۇل ارقىلى مەن بەكزاتتىڭ ىشكى الەمىن، ونىڭ ماحابباتقا تولى جۇرەگىن اشقىم كەلدى”.
كەشتىڭ ەڭ تولقىتار ءساتى – ماحات تورەالىنىڭ بەكزاتتىڭ اناسىنا جاڭا پاتەردىڭ كىلتىن تابىستاۋى بولدى. بۇل يگى قادام ەلدىڭ اسىل پەرزەنتىنە دەگەن حالىقتىق سۇيىسپەنشىلىكتىڭ ايعاعىنداي قابىلداندى.
وسىلايشا، بەكزات رۋحىنا ارنالعان كەش سپورت كەشەنىنىڭ قاق تورىندە ءوتتى. جارىق جۇلدىزداي جارق ەتىپ، قىسقا عۇمىرىندا ۇلتتىڭ ءۇمىتى مەن سەنىمىنە اينالعان بەكزات ساتتارحانوۆ تۋرالى بۇل كىتاپ – بولاشاققا امانات.
“بەكزات. شارشى الاڭنان تىس ءومىرى” – جەڭىستىڭ تاريحى. بۇل تۋىندى – قازاق بالاسىنىڭ ارمانىن اسقاقتاتقان قايسار ۇلعا تاعزىم ءارى كەلەر ۇرپاققا رۋح بەرەتىن اسىل مۇرا.
