ماجارستاندا ەرەكشە جارىس ءوتتى. سەكسارد قالاسىندا قابىر قازۋدان حالىقارالىق چەمپيونات ۇيىمداستىرىلدى. بۇل تۋرالى Shot باسىلىمى جازدى، دەپ حابارلايدى “ادىرنا”.
شارانىڭ ۇيىمداستىرۋشىسى – ماجارستاننىڭ قابىر قازۋشىلار قاۋىمداستىعى. ولاردىڭ ايتۋىنشا، مۇنداي جارىستاردا ەشقانداي قورقىنىشتى نەمەسە وعاش دۇنيە جوق. كەرىسىنشە، بۇل كاسىبىنىڭ ماڭىزدىلىعىن كورسەتىپ، ءتىپتى جاستاردى زيراتتاعى جۇمىسقا تارتۋعا كومەكتەسەدى.
«بۇل – اۋىر ەڭبەك، كۇش پەن شەبەرلىكتى تالاپ ەتەدى. مۇنداي تۋرنيرلەر ءبىزدىڭ جۇمىسقا دەگەن قۇرمەتتى قايتارادى»، – دەيدى قاتىسۋشىلار.
چەمپيوناتتىڭ شارتى ءبىر قاراعاندا قاراپايىم: بەلگىلى ءبىر ولشەمدەگى ور قازۋ. جەڭىس تەك كۇش-جىگەرگە بايلانىستى ەمەس. مۇندا ءبارى ماڭىزدى – دۇرىس ستراتەگيا، ۇيلەسىمدى ارەكەت جانە ساپا، بارىنشا جىلدام جۇمىس ىستەي ءبىلۋ. كوماندالار كورەرمەندەردىڭ كوز الدىندا باق سىناپ، جانكۇيەرلەر ءوز فاۆوريتتەرىن اشىق قولداپ وتىرادى.
ايتا كەتەيىك، وسىنداي جارىستار بۇعان دەيىن رەسەيدە دە وتكەن.
