قازاقستاندا قىلمىستىق زاڭناماعا ەنگىزىلگەن جاڭا تۇزەتۋلەرگە سايكەس، ادام ۇرلاۋ جانە نەكەگە ماجبۇرلەۋ قىلمىستارىنا قاتىستى جاۋاپكەرشىلىك كۇشەيتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى ادىلەت مينيسترلىگى حابارلادى.
ەڭ باستى وزگەرىستەردىڭ ءبىرى – قىلمىستىق كودەكستىڭ 125-بابىنداعى ەسكەرتۋ نورماسىنىڭ الىنىپ تاستالۋى. بۇعان دەيىن جابىرلەنۋشىنى ەركىمەن بوساتقان جاعدايدا كىنالى قىلمىستىق جاۋاپكەرشىلىكتەن بوساتىلۋى مۇمكىن ەدى. ەندى مۇنداي جەڭىلدىك قاراستىرىلمايدى: قىلمىسكەر جابىرلەنۋشىنى بوساتقان كۇننىڭ وزىندە زاڭ الدىندا جاۋاپ بەرەدى.
سونىمەن قاتار، قىلمىستىق كودەكسكە جاڭا 125-1-باپ «نەكەگە ماجبۇرلەۋ» ەنگىزىلدى. بۇل ارەكەت ەندى رەسمي تۇردە قىلمىستىق قۇقىقبۇزۋشىلىق بولىپ سانالادى. نەكەگە ماجبۇرلەگەن ادامعا ايىپپۇل، تۇزەۋ جۇمىستارى، قوعامدىق جۇمىستار نەمەسە باس بوستاندىعىنان ايىرۋ جازاسى قولدانىلادى.
جازا قىلمىستىڭ اۋىرلىعىنا قاراي 2000 اەك-كە دەيىن ايىپپۇل نەمەسە ەكى جىلعا دەيىن باس بوستاندىعىنان ايىرۋعا اكەلۋى مۇمكىن. ەگەر ارەكەت ابايسىزدا اۋىر زارداپتارعا اكەلسە – 5 جىلدان 10 جىلعا دەيىن باس بوستاندىعىنان ايىرۋ، زورلىق-زومبىلىقپەن، كامەلەتكە تولماعاندارعا قاتىستى، تاۋەلدىلىكتى پايدالانىپ نەمەسە ادامدار توبىمەن جاسالعان جاعدايدا – قاتاڭىراق جازا قولدانىلادى.
زاڭداعى بۇل وزگەرىستەر ەڭ الدىمەن ايەلدەر مەن جاسوسپىرىمدەردى قورعاۋعا، سونداي-اق قوعامدا كەڭ تارالعان ءماجبۇرلى نەكەنىڭ الدىن الۋعا باعىتتالعان.
