قازاقستان پرەزيدەنتى اقمولا وبلىسىنا جاساعان ساپارىندا ارقالىق ايماعىنا بيىل مىندەتتى تۇردە باراتىنىن ايتتى، دەپ حابارلايدى “ادىرنا” ۇلتتىق پورتالى.
بۇل تۋرالى رۋسلان جەلدىباي پاراقشاسىندا جازدى.
“اماندىق بولسا، بيىل قوستاناي وبلىسىنا مىندەتتى تۇردە بارامىن. جوسپارىمدا بار. جولداۋىمدا قوستاناي وبلىسىن ارنايى اتاپ ءوتتىم. تورعاي جەرىنە باسا نازار اۋدارۋ كەرەك دەپ ايتتىم. ارقالىققا بيىل مىندەتتى تۇردە بارامىن. كەزىندە ۋادە بەردىم، ونى ورىندايتىن كەزەڭ كەلدى”، – دەدى مەملەكەت باسشىسى.
پرەزيدەنتتىڭ بۇل شەشىمى قوعام تاراپىنان وڭ قابىلداندى. ءماجىلىس دەپۋتاتى قازىبەك يسا بۇل ساپاردىڭ تورعاي ءوڭىرى ءۇشىن ەرەكشە ماڭىزى بار ەكەنىن اتاپ ءوتتى. ونىڭ ايتۋىنشا، الاش ارىستارى احمەت بايتۇرسىنۇلى مەن مىرجاقىپ دۋلاتۇلىنىڭ، سونداي-اق تۇڭعىش قازاق اعارتۋشىسى ىبىراي ءالتىنساريننىڭ ەلىنە پرەزيدەنتتىڭ ات باسىن بۇرۋى – حالىق ءۇشىن كوپتەن كۇتكەن جاڭالىق.
“بۇل ساپار ارقالىق ءوڭىرىنىڭ رۋحاني سەرپىلىسىنە، سونداي-اق الەۋمەتتىك-ەكونوميكالىق جاعدايىنىڭ جاقسارۋىنا ىقپال ەتەدى”، – دەدى قازىبەك يسا.
