ماڭعىستاۋ وبلىسىنىڭ بەينەۋ اۋدانىندا بولعان جاپپاي توبەلەس سالدارىنان 17 جاستاعى ەر بالا كوز جۇمدى،دەپ حابارلايدى "ادىرنا"
پوليتسيانىڭ مالىمەتىنشە 17 جاستاعى جىگىتتى توبەلەسكەندەردىڭ ءبىرى كولىكپەن باسىپ وتكەن. توبەلەسكە 15 ادام قاتىستى.
قۇقىق قورعاۋ ورگاندارىنىڭ قىزمەتكەرلەرى ولاردىڭ تورتەۋىن قاماۋعا الدى، قالعاندارى ەشقايدا كەتپەۋ تۋرالى قولحاتپەن بوساتىلعان. كەلەسى باپتار بويىنشا قىلمىستىق ءىس قوزعالدى:
- ولىمگە اكەپ سوقتىرعان اۋىر دەنە جاراقاتىن كەلتىرۋ;
- بۇزاقىلىق.
ۇستالعانداردىڭ اتا-انالارى بالامىزعا قاتىگەزدىك تانىتتى دەپ قۇقىق قورعاۋ ورگاندارىنا شاعىم تۇسىرگەن.
"سوتقا دەيىنگى تەرگەپ-تەكسەرۋ باسقارماسى تەرگەۋ شارالارىن جۇرگىزىپ جاتىر. ونىڭ قورىتىندىسى بويىنشا پوليتسيا قىزمەتكەرلەرىنە قاتىستى قۇقىقتىق باعا بەرىلەدى", - دەيدى ماڭعىستاۋ وبلىستىق پروكۋراتۋراسى ءبىرىنشى باسقارماسىنىڭ باستىعى دانيار تولەگەنوۆ.
قازىر كەشەندى سوت-مەديتسينالىق ساراپتاماسى جۇرگىزىلىپ جاتىر.
"سوت-مەديتسينالىق ساراپتاما جابىرلەنۋشىنىڭ ناقتى نەدەن كوز جۇمعانىن انىقتايدى. جاسوسپىرىمدەردىڭ سوققىسىنان نەمەسە كولىك باسىپ كەتكەننەن قايتىس بولۋى مۇمكىن. سول كەزدە ءبىز بۇل جايتتارعا قاتىستى ناقتى جانە دۇرىس باعا بەرە الامىز", - دەدى دانيار تولەگەنوۆ.
