اقمولا وبلىسى قوسشى قالاسىنىڭ قوعامدىق مادەني-سپورت كەشەنىندە وتكەن حورەوگرافيا ساباعى كەزىندە 10 جاستاعى وقۋشى قىز كوز جۇمدى، دەپ حابارلايدى "ادىرنا".
ساباق ۇستىندە بالانىڭ كەنەتتەن جاعدايى ناشارلاعان. جانىنداعىلار بىردەن جەدەل جاردەم شاقىرعانىمەن، بالانىڭ ءومىرىن ساقتاپ قالۋ مۇمكىن بولمادى.
اقمولا وبلىستىق دەنساۋلىق ساقتاۋ باسقارماسىنىڭ مالىمەتىنشە، 29 قاڭتار كۇنى ساعات 16:18-دە قوسشى قالاسىنان №152 جەدەل جاردەم قىزمەتىنە شاقىرتۋ تۇسكەن. شاقىرتۋدىڭ سەبەبى – بالانىڭ باسى اۋىرىپ، جۇرەگى اينىعان.
"قوڭىراۋ شالۋشىنىڭ ايتۋىنشا، جاراقات بولماعان، دەنە قىزۋى كوتەرىلمەگەن، قۇرىسىپ قالۋ/قالتىراۋ بەلگىلەرى بايقالماعان. ومىرىنە تىكەلەي قاۋىپ توندىرەتىن بەلگىلەر بولماعاندىقتان، شاقىرتۋ ءتورتىنشى جەدەلدىك ساناتىنا جاتقىزىلدى. شاقىرتۋ 16:34-تە قابىلدانىپ، سول ساتتە ءموبيلدى بريگاداعا جولداندى. بريگادا 16:35-تە جولعا شىعىپ، 16:37-دە وقيعا ورنىنا جەتتى", – دەپ حابارلادى ۆەدومستۆو.
الايدا ارادا از ۋاقىت وتكەن سوڭ بالانىڭ جاعدايى كۇرت ناشارلاعانى جونىندە قايتا قوڭىراۋ تۇسكەن. وسىعان بايلانىستى شاقىرتۋ ەكىنشى جەدەلدىك ساناتىنا اۋىستىرىلىپ، №4 بريگاداعا تاپسىرىلعان.
"اناسىنىڭ ايتۋىنشا، بالا برونحيالدى دەمىكپەمەن (استما) اۋىراتىن بولعان. جەدەل جاردەم بريگاداسى جەتكەن ساتتە بالانى اناسى مەن اپكەسى قولدارىنا كوتەرىپ، جەدەل جاردەم كولىگىنە جەتكىزگەن. وسىعان بايلانىستى دارىگەرلەر دەرەۋ رەانيماتسيالىق شارالاردى جاسادى. الايدا تەكسەرۋ ناتيجەسىندە جەدەل جاردەم كەلگەنگە دەيىن بيولوگيالىق ءولىم تىركەلدى. ءولىمنىڭ ناقتى سەبەبى ازىرگە بەلگىسىز", – دەدى مەديتسينا قىزمەتكەرلەرى.
اقمولا وبلىستىق پوليتسيا دەپارتامەنتىنىڭ ءباسپاسوز قىزمەتى كامەلەتكە تولماعان بالانىڭ قازاسى قوسشى قالاسىنىڭ پوليتسيا بولىمىندە تىركەلگەنىن مالىمدەدى.
"قازىرگى تاڭدا وقيعانىڭ بارلىق ءمان-جايىن انىقتاۋعا باعىتتالعان تەرگەۋ امالدارى جۇرگىزىلىپ جاتىر. الدىن الا بەرىلگەن مالىمەت بويىنشا، ساباق بارىسىندا بالانىڭ دەنساۋلىعى كۇرت ناشارلاعان. تەكسەرۋ ناتيجەسىنە سايكەس پروتسەسسۋالدىق شەشىم قابىلدانادى", – دەپ حابارلادى پوليتسيا دەپارتامەنتى.
