Digital Bridge 2025 فورۋمى اياسىندا IT الەمدەگى ەڭ ءىرى ستارتاپ-دودالارىنىڭ ءبىرى – Astana Hub Battle ءوتتى. ورتالىق ەۋرازيا ەلدەرىنەن جينالعان 180 Iت-كومپانيا ءوز ءونىمىن دامىتۋ ءۇشىن جالپى سوماسى $125 000 قۇرايتىن جۇلدە قورىن ساراپقا سالدى.
جارتىلاي فينالعا باسەكەگە قابىلەتتى 79 جوبا ءوتتى، ولاردىڭ ىشىنەن 14 ۇزدىك ستارتاپ فينالدىق شايقاسقا ىرىكتەلدى: eXpace Technology, Hemo.Labs, YAYA, MoonAI, flection.ai, CYBERPACK.AI, OpenSpot, Mirai Tech, Oina AI, AIGINEER, NeuroGuard AI, MacDent, MindShield جانە WeGlobal AI. سونىمەن بىرگە فينالعا AI Sana Generative Pitch بايقاۋىندا جەڭىسكە جەتكەن TrustExam AI دا قوسىلدى.
«اstana Hub Battle ءوزىنىڭ وڭىردەگى IT-كاسىپكەرلەر ءۇشىن باستى الاڭ ەكەنىن تاعى ءبىر مارتە دالەلدەدى. بۇگىندە ورتالىق ەۋرازيانىڭ ستارتاپتارى جاساندى ينتەللەكت، مەديتسينا، ءبىلىم بەرۋ، قارجى تەحنولوگيالارى جانە باسقا دا سالالاردا باسەكەگە قابىلەتتى شەشىمدەر ۇسىنىپ وتىر. مۇنداي باستامالار ءبىلىم ەكونوميكاسىن قالىپتاستىرىپ، جاڭا جۇمىس ورىندارىن اشىپ، سالانىڭ دامۋىنا تىڭ سەرپىن بەرەدى. ءبىز ءۇشىن كاسىپكەرلەردى قولداۋ عانا ەمەس، جاستاردىڭ تەحنولوگياعا دەگەن قىزىعۋشىلىعىن ارتتىرۋ دا اسا ماڭىزدى. سەبەبى بولاشاققا باستايتىن ەڭ ۇلكەن مۇمكىندىكتەر وسى IT مەن AI سالاسىندا جاتىر. بۇل شارانىڭ جۇزەگە اسۋىنا ۇلەس قوسقان سەرىكتەستەرىمىز بەن دەمەۋشىلەرىمىزگە شىنايى ريزاشىلىعىمدى بىلدىرەمىن. ورتاق كۇش-جىگەرىمىزدىڭ ارقاسىندا بۇل ءىس-شارا ءساتتى ءوتتى»، – دەدى Astana Hub باس ديرەكتورى ماعجان ماديەۆ.
Astana Hub Battle 2025 جەڭىمپازدارى جەتى نوميناتسيا بويىنشا انىقتالدى. العاشقى بەس نەگىزگى ساناتتىڭ ارقايسىسى $25 000 الدى.
Best Social Impact نوميناتسياسىندا جاساندى ينتەللەكتتى مەكتەپ وقۋشىلارىنىڭ كاسىبي باعدارىن انىقتاۋعا جانە پسيحولوگيالىق قولداۋ كورسەتۋگە پايدالاناتىن WeGlobal.AI جەڭىسكە جەتتى. جۇلدەنى inDrive نەگىزىن قالاۋشىسى ءارى باس ديرەكتورى ارسەن تومسكي تابىس ەتتى.
Discovery of the Year نوميناتسياسىندا پاركينسون اۋرۋىن ەرتە كەزەڭدە انىقتاۋعا ارنالعان ءموبيلدى قوسىمشا مەن بىلەزىك جاساپ شىعارعان MindShield ۇزدىك دەپ تانىلدى. ماراپاتتى قر پرەمەر-ءمينيسترىنىڭ ورىنباسارى، جاساندى ينتەللەكت جانە تسيفرلىق دامۋ ءمينيسترى جاسلان ماديەۆ تابىستادى.
Exponential Growth نوميناتسياسىنىڭ جەڭىمپازى – مەملەكەتتىك ورگاندارعا، ۋنيۆەرسيتەتتەرگە جانە ەمتيحان ورتالىقتارىنا اكادەميالىق ادالدىقتى ارتتىرۋعا جانە كوشىرۋ فاكتىلەرىمەن كۇرەسۋگە كومەكتەسەتىن TrustExam AI ستارتابى. جۇلدەنى Telegram نەگىزىن قالاۋشىسى ءارى باس ديرەكتورى پاۆەل دۋروۆ تابىستادى.
Ticket to the Future (Astana Hub Ventures-تەن SAFE) نوميناتسياسىندا شاعىن جانە ورتا بيزنەس ءۇشىن جاساندى ينتەللەكت نەگىزىندە جۇمىس ىستەيتىن وپەراتسيالىق جۇيە ۇسىناتىن Moon.AI ستارتابى جەڭىمپاز اتاندى. جۇلدەنى Astana Hub باس ديرەكتورى ماعجان ماديەۆ تابىستادى.
MA7 Award (MA7 Ventures اتىنان) نوميناتسياسىندا قازاقستاندىق DeepTech-ستارتاپ Mirai Tech توپ جاردى. كومپانيا جاساندى ينتەللەكت پەن اۆتونومدى قۋاتتاندىرۋعا نەگىزدەلگەن سپورت پەن رەابيليتاتسياعا ارنالعان توزىلمايتىن سەنسورلار ازىرلەۋدە. جۇلدەنى MA7 Ventures نەگىزىن قالاۋشىسى مۇرات ابدراحمانوۆ تابىستادى.
«قازاقتەلەكوم» اق ارنايى گرانت رەتىندە قۇنى $25 000-عا تەڭ GPU-رەسۋرستاردى ۇسىندى. ونى ستوماتولوگيالىق كلينيكالار مەن مەديتسينا ورتالىقتارىنا ارنالعان بۇلتتى ERP/CRM پلاتفورما ۇسىناتىن MacDent جەڭىپ الدى. جۇلدەنى «قازاقتەلەكوم» اق باسقارما توراعاسى باعدات مۋسين تابىس ەتتى.
سونىمەن قاتار Yandex Qazaqstan Startup Spotlight Award ارنايى ماراپاتى flection.ai ستارتابىنا بەرىلدى. بۇل جوبا – ينسۋلتتان كەيىنگى وڭالتۋدى جاساندى ينتەللەكتكە نەگىزدەلگەن ويىندار ارقىلى جەڭىلدەتەتىن ۆەب-پلاتفورما. جۇلدەنى Yandex Cloud كومپانياسىنىڭ قازاقستان جانە ورتالىق ازياداعى ماركەتينگ بويىنشا ديرەكتورى جانار ماحامبەتوۆا تابىستادى.
ء«بىز ەشقانداي ينۆەستيتسيا تارتقان جوقپىز، بيزنەستى ءوز كۇشىمىزبەن دامىتتىق. بۇگىندە ءبىز ءوزىمىزدى وتە سەنىمدى سەزىنەمىز جانە جاڭا نارىقتاردى باعىندىرۋعا دايىنبىز. الداعى جوسپارىمىز – اقش، كانادا جانە ۇلىبريتانياعا شىعۋ. قازىردىڭ وزىندە ۇلىبريتانياداعى ءىرى ۇيىممەن كەلىسىمشارتقا قول قويدىق، بولاشاقتا وندا جىلىنا 4 ميلليون ادامعا دەيىن قىزمەت كورسەتۋدى ماقسات ەتىپ وتىرمىز. ءبىزدىڭ ستارتاپقا 5 جىل تولدى، ال Astana Hub Battle-دەگى بۇل جەڭىس – دۇرىس جولدا ەكەنىمىزدىڭ ايعاعى»، – دەدى Astana Hub Battle 2025 جەڭىمپازى، TrustExam AI ستارتابىنىڭ نەگىزىن قالاۋشىسى نۇرالى سارباقىش.
Astana Hub Battle-عا MVP نەمەسە PMF ساتىسىندا ماسشتابتالاتىن جوبالار قاتىستى. بيىلعى جىلى بايقاۋعا قازاقستان، تاجىكستان، رەسەي، قىرعىزستان، وزبەكستان، ازەربايجان، موڭعوليا، اقش جانە ءباا ەلدەرىنەن وتىنىمدەر ءتۇستى.
ەسكە سالايىق، Digital Bridge 2025 حالىقارالىق فورۋمى 2–4 قازان ارالىعىندا استانادا وتۋدە. بۇل – ورتالىق ەۋرازياداعى تەحنولوگيا جانە جاساندى ينتەللەكت سالاسىنداعى ەڭ اۋقىمدى ءىس-شارا، ول الەمدىك يندۋستريا كوشباسشىلارىنىڭ، ينۆەستورلاردىڭ، ساراپشىلاردىڭ جانە ستارتاپتاردىڭ باسىن قوستى.
بيىلعى فورۋم سەرىكتەستەر مەن دەمەۋشىلەردىڭ قولداۋىنىڭ ارقاسىندا ۇيىمداستىرىلدى. بارلىق شىعىن دەمەۋشىلىك قاراجات ەسەبىنەن جابىلدى.
