«جاس ۇستاز: تابىسقا اپارار جول»

5062
Adyrna.kz Telegram

تالدىقورعان قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىندە  جەتىسۋ وبلىسى جالپى ءبىلىم بەرەتىن مەكتەپتەردىڭ جاس پەداگوگتەرىنە ارنالعان «جاس ۇستاز: تابىسقا اپارار جول» اتتى ايماقتىق فورۋم ۇيىمداستىرىلدى. فورۋمعا 130–دان استام جاس مامان قاتىستى.

جاستارعا ومىرلىك تاجىريبەلەرىمەن ءبولىسۋ ءۇشىن جەتىسۋ وبلىسى ءبىلىم باسقارماسىنىڭ باسشىسى ادامبەكوۆا ايجان مامانوۆنا، دامير نۋركەجانوۆ– «Future-IT» روبوتوتەحنيكا مەكتەبىنىڭ جەتەكشىسى، «قازاقستاننىڭ 100 جاڭا ەسىمى» جوباسىنىڭ جەڭىمپازى، دامير ديگاي - «Zhetysu University» بەدەل ساياساتى ورتالىعىنىڭ ديرەكتورى شاقىرىلدى.

— «جاس ۇستاز: تابىسقا اپارار جول» ايماقتىق فورۋم – وتە ماڭىزدى ءىس-شارا. وبلىس بويىنشا بىزدە 1800 استام جاس ۇستازدار بار. سونىڭ ىشىندە بيىلعى وقۋ جىلى 600 جاس ۇستاز كەلدى. فورۋم قاتىسۋشىلارى ءبىر-بىرىمەن ارالاسىپ، تاجىريبە الماسىپ، جاڭا يدەيا الىپ جانە تابىسقا قالاي جەتۋگە بولادى دەگەن سۇراقتارىنا جاۋاپ الا الدى دەگەن سەنىمدەمىن، — دەيدى جەتىسۋ وبلىسى ءبىلىم باسقارماسىنىڭ باسشىسى ادامبەكوۆا ايجان مامانوۆنا.

فورۋمعا قاتىسشىلار تاقىرىپتىق الاڭداردا باس قوسىپ، «ساباق قۇراستىرۋ: جيناقتايمىز جانە قولدانامىز»، «فۋنكتسيونالدى ساۋاتسىزدىق: تاپشىلىقتى قالاي تولتىرۋعا بولادى»، «ينكليۋزيۆتى ءبىلىم: جاناما تاجىريبەدەن ءوز ءىس-ارەكەتىنە دەيىن»، «وقىتۋدا اكت-نى ءتيىمدى پايدالانۋ» سىندى وزەكتى ماسەلەلەردى قوزعاعان ساباقتاردا باس قوستى. سونىمەن قاتار  «ەموتسيالىق مادەنيەت» ترەنينگى، جاس ۇستازداردىڭ شەبەرلىك ساباقتارى،  ACTIVE SPOT ۇيىمداستىرىلدى.

— قازىرگى كەزدە كاسىبيلىك دەڭگەيى جوعارى ماماندار دايىنداپ شىعارۋ قانداي وزەكتى ماسەلە بولسا، جاس ماماندارعا قولداۋ كورسەتۋ ءدال سونداي كوكەيكەستى ماسەلە بولىپ تابىلادى. بۇل ماقساتقا جەتۋدىڭ ءتيىمدى تەتىكتەرىنىڭ ءبىرى الدىڭعى تولقىن اعالاردىڭ كەيىنگى تولقىندى تاربيەلەۋ ءىسى ەكەندىگىندە داۋ جوق، — دەيدى تالدىقورعان قالاسىنداعى پەداگوگيكالىق شەبەرلىك ورتالىق فيليالىنىڭ اعا مەنەدجەرى گاۋحار قازىگۋلوۆا.

فورۋم جاس ۇستازداردىڭ مەكتەپتە وقىتۋدىڭ قازىرگى زامانعى ۇردىستەرىن تالقىلاۋ، زياتكەرلىك داعدىلاردى دامىتۋ جانە تسيفرلىق مۇمكىندىكتەردى تانىمال ەتۋ ءۇشىن بىرىڭعاي الاڭعا اينالىپ ۇلگەردى. ويتكەنى فورۋم مۇعالىمدەردىڭ كاسىبي تۇرعىدا تابىستى بولۋىنا باعدار جاساپ، ولاردى ۇنەمى وقۋعا جانە دامۋعا ىنتالاندىرادى.

— فورۋم وتە اقپاراتتى ءوتىپ جاتىر. پسيحولوگيالىق، ەموتسيونالدىق تۇرعىدا وقۋشىلارمەن جۇمىس، وزىمىزگە كەرەكتى ونلاين پلاتفورمالاردى، وقۋشىلاردىڭ عىلىمي - شىعارماشىلىق، زەرتتەۋشىلىك ىزدەنىسىن قالىپتاستىرۋ جولدارىن بىلدىك. پەداگوگيكالىق شەبەرحانالارعا قاتىسىپ، تاجىريبەلەر پانوراماسىنىڭ ءتۇرلى تاقىرىپتاعى مازمۇنىمەن تانىستىم، —  اسلان رافيكوۆ كوكسۋ اۋدانى، بيعايشا قۇنتاقباەۆا اتىنداعى ورتا مەكتەبىنىڭ فيزيكا ءپانى مۇعالىمى.

ەلىمىزدىڭ بارلىق نازارباەۆ زيتياكەرلىك مەكتەپتەرىنىڭ بازاسىندا فورۋمعا ەلىمىزدىڭ جالپى ءبىلىم بەرەتىن مەكتەپتەرىنەن 3 مىڭنان استام جاس مامان قاتىسۋدا.

 

پىكىرلەر