«ۆكونتاكتە» مەن Telegram مەسسەندجەرىنىڭ نەگىزىن قالاۋشى پاۆەل دۋروۆ الماتى وبلىسىنداعى كولسايعا شومىلىپ، ەرەجەنى بۇزعان، دەپ حابارلايدى "ادىرنا" ۇلتتىق پورتالى Tengri Life-قا سىلتەپ.
كاسىپكەر سۋعا تۇسكەن ءساتىنىڭ ۆيدەوسىن ءوز Telegram-ارناسىنداعى ستوريستە جاريالاپ، «كەرەمەت ءجۇزدىم» دەگەن قىسقا جازبا قالدىرعان.
الايدا كەيبىر جەلى قولدانۋشىلارى كولسايعا شومىلۋعا بولا ما، الدە بۇل ەرەجەنى بۇزۋ بولىپ سانالا ما دەگەن سۇراق قويدى. ۇلتتىق پارك ەرەجەسىنە سايكەس، تۋريستەرگە تەك ارنايى بەلگىلەنگەن ايماقتاردا عانا سۋعا تۇسۋگە رۇقسات ەتىلەدى. باسقا جەرلەردە نەمەسە سۋىق مەزگىلدە شومىلۋ – بەلگىلەنگەن تالاپتاردى بۇزۋ بولىپ ەسەپتەلەدى.
ۇلتتىق پاركتىڭ تابيعي كەشەندەردى قورعاۋ جانە قالپىنا كەلتىرۋ ءبولىمى كولدە شومىلۋ اكىمشىلىك قۇقىقبۇزۋشىلىق بولىپ سانالاتىنىن حابارلادى.
"كولساي كولدەرىندە شومىلۋ تۋريستىك مارشرۋتتىڭ تولقۇجاتىنا سايكەس قاتاڭ تۇردە تىيىم سالىنعان. وسى جاعدايعا بايلانىستى پارك باسشىلىعى قىزمەتتىك تەكسەرىس باستادى. ونىڭ قورىتىندىسى بويىنشا ءتيىستى باقىلاۋدى قامتاماسىز ەتپەگەن جاۋاپتى قىزمەتكەرلەرگە تارتىپتىك شارالار قولدانىلادى", - دەلىنگەن " رەسمي حابارلامادا.
بەلگىلەنگەن ەرەجەنى بۇزعاندار ءۇشىن 10 ايلىق ەسەپتىك كورسەتكىش كولەمىندە ايىپپۇل سالىنادى. 2025 جىلى بۇل سوما 39 320 تەڭگەنى قۇرايدى.
كولساي كولدەرى — الماتى وبلىسىنداعى ىلە الاتاۋى جوتاسىندا، تەڭىز دەڭگەيىنەن 1 800–2 500 مەتر بيىكتىكتە ورنالاسقان ءۇش اسەم تاۋ كولى. مۇنداعى سۋ وتە ءمولدىر ءارى سالقىن: ءتىپتى جازدا دا تەمپەراتۋراسى 15 گرادۋستان اسپايدى.
ايتا كەتەيىك، پاۆەل دۋروۆ قازاقستانعا Digital Bridge 2025 فورۋمىنا قاتىسۋ ءۇشىن كەلگەن. سونداي-اق، ول فورۋمنان تىس پرەزيدەنت توقاەۆپەن دە جۇزدەسىپ، قابىلداۋىندا بولدى.
