جامبىل وبلىسىندا سوڭعى 40 جىلدا العاش رەت فۋرمانوۆ اينالما كانالىندا مەحانيكالىق تازالاۋ جۇمىستارى جۇرگىزىلىپ جاتىر. بۇل كانال ارقىلى شۋ وزەنىنىڭ سۋى تۇركىستان وبلىسىنىڭ سوزاق اۋدانىنا باعىتتالادى. بۇگىندە كانالدىڭ ۇزىندىعى 52 شاقىرىم بولاتىن بولىگى تازارتىلدى، دەپ حابارلايدى "ادىرنا" ءتىلشىسى.
فۋرمانوۆ اينالما كانالىن تازالاۋ جۇمىسىنا ارنايى تەحنيكالار تارتىلعان. اتاپ ايتقاندا، 8 شىنجىر تاباندى ەكسكاۆاتور مەن ەكى تيەگىش. تابيعاتتى قورعاۋ ماقساتىندا سۋ جىبەرۋ ماۋسىمى باستالعانعا دەيىن 70 شاقىرىمنان استام اۋماقتى تازالاۋ جوسپارلانعان.
مەحانيكالىق تازالاۋ جۇمىستارىنىڭ ناتيجەسىندە شۋ وزەنى ارقىلى جۇرگىزىلەتىن ەكولوگيالىق سۋ جىبەرۋدىڭ تيىمدىلىگى ارتىپ، تۇركىستان وبلىسىنىڭ سوزاق اۋدانىنداعى ەكولوگيالىق جاعداي جاقسارادى دەپ كۇتىلىپ وتىر. ايتا كەتەيىك، بىلتىر قىركۇيەكتەن باستاپ بيىل ءساۋىر ايىنا دەيىن شۋ وزەنى ارقىلى سوزاق اۋدانىنا 1,5 ميلليارد تەكشە مەتردەن استام سۋ جىبەرىلگەن بولاتىن.
فۋرمانوۆ اينالما كانالىنىڭ جالپى ۇزىندىعى - 120 شاقىرىم، ال وتكىزۋ قۋاتى - سەكۋندىنا 45-50 تەكشە مەتر. ول جامبىل وبلىسىنىڭ مويىنقۇم اۋدانىنداعى قىلىشباي، قۇموزەك، قارابوگەت جانە سارىوزەك ەلدى مەكەندەرىنىڭ ماڭىنان وتەدى.
جەرگىلىكتى تۇرعىندار بۇل جۇمىستاردىڭ ماڭىزى زور ەكەنىن ايتىپ جاتىر.
«فۋرمانوۆ اينالما كانالى ءبىز ءۇشىن وتە ماڭىزدى. ول مالعا سۋ بەرۋگە، باۋ-باقشا مەن جايىلىمدى سۋارۋعا پايدالانىلادى. قازىر كانالدىڭ ءتۇبى ەكى مەترگە دەيىن تازالانىپ، جاعالاۋلارى قالپىنا كەلتىرىلىپ جاتىر. بۇل ءىستىڭ ماڭىزى زور. سۋ رەسۋرستارى جانە يرريگاتسيا مينيسترلىگىنىڭ قولداۋىمەن جۇرگىزىلىپ جاتقان جۇمىس سارىسۋ مەن سوزاق اۋداندارىنىڭ تۇرعىندارىنا ۇلكەن كومەك بولارىنا سەنەمىز»، – دەيدى مويىنقۇم اۋدانىنىڭ تۇرعىنى تەمىرلان اقبالاەۆ.
