ەكولوگتار كۇنىنە وراي ۇلىتاۋ وبلىسىندا قورشاعان ورتانى قورعاۋ سالاسىنىڭ ماماندارىنا ارنالعان سالتاناتتى جيىن ءوتتى. ءىس-شارا بارىسىندا ءوڭىردىڭ ەكولوگيا سالاسىنا سۇبەلى ۇلەس قوسقان ماماندارعا وبلىس اكىمىنىڭ قۇرمەت گراموتاسى، العىس حاتتارى، سونداي-اق قر ەكولوگيا جانە تابيعي رەسۋرستار مينيسترلىگىنىڭ جانە وبلىستىق ەكولوگيا دەپارتامەنتىنىڭ ماراپاتتارى تابىستالدى.
ماراپاتتاردى ۇلىتاۋ وبلىسى اكىمىنىڭ ورىنباسارى ۇلانتاي ۇسەنوۆ تاپسىرىپ، سالا قىزمەتكەرلەرىن كاسىبي مەرەكەمەن قۇتتىقتادى.
«قورشاعان ورتانى ساقتاۋ – تەك سالا ماماندارىنىڭ عانا ەمەس، بارشا قوعامنىڭ ورتاق جاۋاپكەرشىلىگى. دەگەنمەن ءدال سىزدەر – تابيعاتپەن ۇندەسىپ، ەل يگىلىگى ءۇشىن ەڭبەك ەتىپ جۇرگەن كاسىبي ماماندار – بۇل جولدا الدىڭعى قاتارداسىزدار. تابيعاتپەن ءتىل تابىسۋ، ەكوجۇيەنىڭ تۇراقتىلىعىن ساقتاۋ جولىنداعى ەڭبەكتەرىڭىز – ەرەكشە قۇرمەتكە لايىق. بۇگىنگى ماراپاتتار – سول ەڭبەكتىڭ لايىقتى باعاسى»، – دەدى وبلىس اكىمىنىڭ ورىنباسارى ءوز قۇتتىقتاۋ سوزىندە.
سالتاناتتى جيىن بارىسىندا ءوڭىردىڭ ەكولوگيالىق احۋالى، جاسىل ايماقتى دامىتۋ، قالدىقتاردى باسقارۋ جانە سۋ رەسۋرستارىن ءتيىمدى پايدالانۋ بويىنشا اتقارىلىپ جاتقان جۇمىستار جونىندە دە ايتىلدى.
